Од музејот посветен на францускиот импресионист Пјер-Огист Реноар во Кањ-сир-Мер на француската ривиера, рано во вторникот се украдени четири уметнички дела, чија вкупна вредност се проценува на околу девет милиони евра. Лоповите за време на бегството испуштиле едно од украдените дела, а двајцата осомничени сè уште не се уапсени.
Провалата се случила нешто пред шест часот наутро. Според зборовите на градоначалникот на Кањ-сир-Мер, Бријан Масон, алармот во Музејот Реноар се активирал во 5:48 часот, а полицијата на местото на настанот пристигнала само пет минути подоцна. „Утрово две лица провалија во Музејот Реноар и украдоа четири уметнички дела“, објави Масон, додавајќи дека сторителите ги снимиле надзорните камери. Лоповите по провалата се дале во бегство, но притоа оставиле една од украдените слики. Полицијата сега интензивно трага по нив, а во тек е истрага. На местото на настанот се распоредени и градската и националната полиција. Идентитетот на украдените уметнички дела засега не е официјално објавен. Француските медиуми, повикувајќи се на податоци од АФП, наведуваат дека нивната вкупна проценета вредност е околу девет милиони евра. Градоначалникот Масон кражбата ја опиша како сериозен напад врз историјата и културното наследство на градот. „Да се нападне Музејот Реноар значи да се нападне дел од историјата и наследството на Кањ-сир-Мер. Овие настани се особено сериозни“, порача тој.
© Vecer.mk, правата за текстот се на редакцијата
