Висок руски дипломат денеска изјави дека Москва би можела да склучи пактови за ненапаѓање со земји-членки на НАТО како дел од новата европска безбедносна архитектура – тема за која моментално се разговара во рамките на мировниот процес за Украина, пренесе Ројтерс.
Владимир Медински, главниот руски преговарач на разговорите во Абу Даби, истакна дека концептот за нова безбедносна рамка за Европа бил централна тема за време на дводневните преговори – кои оваа недела продолжија за првпат по февруари – иако тој не изнесе конкретни детали во врска со дискусиите.
Медински по завршувањето на разговорите изјави дека е постигнато меѓусебно разбирање за одредени прашања и дека ќе следат нови разговори.
Во изјава емитувана на руската државна телевизија, Медински наведе дека Русија и Украина се договориле за размена на затвореници од голем обем – најновата во низата слични размени.
Сепак, тој покажа резервираност кон можноста европските земји да се приклучат на преговорите, истакнувајќи дека не е јасно за што би можеле да разговараат Русија и Европската унија, со оглед на тоа што, според него, од европска страна нема никакви предлози, пренесе Ројтерс.
Украинскиот претседател Володимир Зеленски се надоврза на повиците Европа да биде вклучена во сите идни мировни преговори, истакнувајќи дека „Европа мора да биде застапена во секоја фаза од вистинската дипломатија“.
Во објава на платформата Икс, по добиениот брифинг за разговорите во Абу Даби, тој изјави:
„Прво, постигнат е важен хуманитарен договор во врска со подготовките за нова размена.
Второ, страните разговараа за своите ставови околу гарантирањето на безбедноста, при што е неопходно првиот чекор да биде ставање крај на оваа војна и обезбедување безбедносни гаранции за Украина.
Трето, се разговараше за пошироки формати за понатамошна работа, во кои би биле вклучени и Европејците.
Понатаму, американските претставници заминуваат за Русија, а по тие разговори, повторно ќе ги усогласиме нашите ставови и ќе утврдиме кои се можните следни чекори. Утре се среќаваме со нив во Даблин.
Приоритет на Украина е војната да заврши што е можно поскоро, со достоинствен мир. Сметаме дека Европа мора да биде застапена во секоја фаза од вистинската дипломатија.
Од суштинско значење е Соединетите Држави да заземат цврст став и да извршат влијание врз изворот на оваа војна – односно Русија – за таа самата да ѝ стави крај на војната што ја предизвикала.“
Алексеј Добринин, висок функционер во руското Министерство за надворешни работи, денеска претстави низа детални предлози поврзани со идејата за безбедносна конференција во Москва.
Првата опција што ја предложи вклучува сојуз за колективна одбрана или билатерални договори за заемна помош, слични на оние што Русија ги има склучено со Белорусија и Северна Кореја.
Втората опција подразбира политички договори со кои се утврдува дека нема да се дава помош на противниците на другата страна во случај на агресија – слично на договорот што Москва го има со Иран.
Третата претставена опција вклучува билатерални пактови за ненапаѓање.
„На пример, такви договори би можеле да се склучат – меѓу другите можности – со поединечни земји-членки на НАТО, кои потоа би добиле, на пример, дополнителни, конкретни безбедносни гаранции од Руската Федерација“, изјави Добринин на една конференција. Некои европски политичари се противат на можноста за какви било дискусии за севкупната безбедносна архитектура во Европа, инсистирајќи дека прво мора да се постигне напредок кон решавање на конфликтот во Украина, вклучително и прекин на огнот. Претставници на САД, сепак, јасно ставија до знаење дека се отворени за таков разговор.
© Vecer.mk, правата за текстот се на редакцијата
