Претседателката на Европската комисија, Урсула фон дер Лајен, по состанокот со новиот унгарски премиер Петер Маѓар објави дека Европската Унија одмрзнува вкупно 16,4 милијарди евра од европските фондови. Овие средства беа долго време блокирани за време на претходната влада на Виктор Орбан во Будимпешта. Фон дер Лајен истакна дека е договорен цврст рамковен план кој гарантира дека Унгарија суштински ќе ги реши проблемите поврзани со корупцијата и владеењето на правото. Од вкупната сума, десет милијарди евра се од Механизмот за закрепнување и отпорност, додека остатокот отпаѓа на кохезиони средства и фондови наменети за академските слободи. Унгарија веќе следната недела ќе го претстави ревидираниот национален план, со оглед на тоа што рокот за поднесување на барањата за исплата истекува на 31 август.
Новиот премиер Петер Маѓар потенцираше дека одмрзнувањето на овие пари било неговото главно предизборно ветување кое сега е целосно исполнето. Тој директно ја обвини претходната влада на Орбан дека со години лажела дека фондовите се блокирани поради идеолошки причини, мигрантите или ставовите за војната во Украина. Според Маѓар, вистинската и единствена причина за блокадата била корупцијата од неверојатни размери во времето на Орбан. Унгарија во моментов сè уште плаќа казна од еден милион евра дневно поради кршење на европските закони за азил. Новиот премиер истакна дека Орбан останал без ниту еден сојузник во Унијата токму поради неговото нерационално користење на правото на вето.
Во однос на прашањето за Украина, Маѓар појасни дека согласноста на Будимпешта за отворање на првиот преговарачки кластер со Киев не е поврзана со одмрзнувањето на парите од ЕУ. Напротив, тоа зависи исклучиво од почитувањето на правата на унгарското малцинство кое живее таму. Тој нагласи дека за неговата влада најважно е да добие цврсти гаранции од украинските партнери дека околу 100 илјади Унгарци во Украина ќе можат непречено да го користат својот мајчин јазик.
© Vecer.mk, правата за текстот се на редакцијата
