Договорот ќе биде вреден околу 2.000.000.000 долари, за малцински удел
Американскиот магнат и основач на Амазон, Џеф Безос, дефинитивно ќе купи малцински удел во Ливерпул, потврди познатиот англиски клуб. Сопствениците на Ливерпул се согласија да продадат околу една третина од клубот на конзорциум во кој е вклучен и Џеф Безос и ќе учествува во инвестициска група предводена од Амит Батија, зет на милијардерот за челик Лакшми Митал и до неодамна акционер во тимот од Чемпионшип, Квинс Парк Ренџерс. Конечниот договор значи дека некои од најбогатите луѓе во светот ќе станат ко-сопственици на Ливерпул.
Фенвеј Спортс Груп (FSG), мнозинскиот сопственик на клубот, сакаше да го заврши договорот до крајот на неделата и сега е постигнат конечен договор. Вредноста на Ливерпул се проценува помеѓу 6.000.000.000 и 7.000.000.000 долари, додека малцинскиот пакет (30% од акциите) - ако можете така да го наречете - се проценува на околу 2.000.000.000 долари.
Пред 16 години, FSG Group го купи Ливерпул за околу 400.000.000 долари, во време кога клубот беше во сериозни финансиски проблеми и успеаја да ја зголемат вредноста на „Црвените“ за 15 пати, па затоа сериозно профитираа од оваа малцинска продажба. Претходно, инвестицискиот фонд Dynasty Equity купи мал блок акции, кога структурата на сопственост на „Енфилд“ се менуваше во 2023 година.
Што се однесува до Безос, Форбс го проценува неговото богатство на 280.000.000.000 долари, што го става близу врвот на листата на најбогати луѓе во светот. Новиот потпретседател на клубот е Амит Батија, кој е исто така милијардер и моментално раководи со инвестициската фирма АБ Капитал, која инвестира во различни сектори, вклучувајќи технологија, медиуми, недвижности, малопродажба и здравствена заштита. Тој е и раководител на конзорциумот.
© Vecer.mk, правата за текстот се на редакцијата
