„Без оваа делница, сè останато што го правиме немаше да има смисла“, порача премиерот Христијан Мицкоски на денешниот почеток на изградбата на автопатот Кичево – Букојчани. Тој нагласи дека со реализацијата на овој проект се заокружува концептот за целосно автопатско поврзување на Скопје и Охрид, но и се остварува стратешката определба на Владата Македонија да стане значајна европска транспортна, железничка и енергетска раскрсница.
Мицкоски истакна дека изградбата на оваа делница претставува сериозен инженерски предизвик, но и клучен дел од инфраструктурната стратегија на државата.
„Сè беше кажано, јас нема да се повторувам колку има надвозници, натпатници, тунели и слично, бидејќи претставува навистина предизвик од инженерски аспект. Сега зборувам како инженер, не зборувам како претседател на Владата. Но, она што за мене е значајно е дека без оваа секција сè останато што го правиме немаше смисла“, истакна премиерот.
Тој посочи дека со почетокот на изградбата на делницата Кичево – Букојчани, целосниот проект за автопатско поврзување на Охрид со главниот град добива вистинска целина.
Според Мицкоски, овој проект е дел од пошироката визија на Владата, поставена уште во 2024 година, Македонија да се развива како регионална раскрсница заснована на четири инфраструктурни столба.
„Денеска зборуваме за четири столба, а тоа е да бидеме раскрсница на два паневропски коридори, Коридорот 8 и Коридорот 10, во смисла на патната инфраструктура, железничката инфраструктура, енергетската и гасната“, нагласи Мицкоски.
Премиерот потенцираше дека ваквите инфраструктурни инвестиции ќе го зајакнат геостратешкото значење на Македонија и ќе создадат нови можности за економски развој, привлекување инвестиции и развој на современи индустрии.
Со реализацијата на инфраструктурните проекти, според Мицкоски, државата добива поголема додадена вредност и нови перспективи за граѓаните и стопанството.
© Vecer.mk, правата за текстот се на редакцијата
