Голема меѓународна полициска акција резултираше со разбивање на криминална група осомничена за трговија со наркотици. Во координираната акција, спроведена во повеќе држави, се уапсени неколку лица, а полицијата запленила околу 300 килограми марихуана.
Во акцијата од македонска страна учествуваше Министерството за внатрешни работи преку Одделот за криминалистичка полиција, во координација и соработка со мешовити полициски тимови од Косово и Грција. Истражните активности се спроведуваа под водство на надлежните обвинители од Македонија, Косово и Грција.
Станува збор за меѓународна операција која е резултат на подолготрајна соработка, координација и размена на оперативни информации меѓу полициските и правосудните органи на трите земји. Преку заедничкото постапување биле следени активностите на криминалната група, по што биле преземени координирани полициски дејствија за нејзино сузбивање.
Во рамки на досегашните активности се уапсени неколку лица за кои постои сомнение дека биле дел од меѓународната криминална група, а запленети се околу 300 килограми марихуана наменета за нелегална трговија.
Полициската операција сè уште не е завршена. Истражните дејствија продолжуваат во текот на денот во Македонија и Косово, како и во наредниот период, со цел целосно расчистување на случајот, утврдување на улогата на лицата опфатени со истрагата и откривање на сите околности поврзани со функционирањето на криминалната група.
Поради тоа што истрагата е активна, дополнителни детали за бројот на опфатени лица, начинот на дејствување на групата и останатите преземени активности се очекуваат по завршувањето на соодветните истражни постапки.
Акцијата претставува уште една потврда за решеноста на македонската полиција да се спротивстави на организираниот криминал и меѓународната трговија со наркотици, преку сериозен и професионален пристап, оперативна работа и брза размена на информации со меѓународните партнери.
Борбата против организираниот криминал не завршува на државните граници, поради што соработката меѓу полициските и правосудните институции од регионот останува еден од клучните механизми за откривање и сузбивање на криминалните мрежи кои дејствуваат на територијата на повеќе држави.
Надлежните институции ќе продолжат со активностите, а повеќе информации за резултатите од операцијата се очекуваат по завршувањето на истражните дејствија.
© Vecer.mk, правата за текстот се на редакцијата
