Премиерот Христијан Мицкоски остро реагираше на одлуката на Обвинителството за затворање на предметот поврзан со модуларните болници, при што се осврна и на трагедијата во Тетово во која животот го загубија 14 лица. Мицкоски посочи дека постапката трае веќе пет години, период во кој, како што рече, во јавноста биле пласирани различни информации и наоди поврзани со случајот.
Тој остро ја критикуваше одлуката на обвинителот, кој е при крајот на мандатот, оценувајќи дека со неа постапката е запрена и покрај трагичните последици од пожарот.
„Во модуларната болница во Тетово живи гореа 14 луѓе. Ќе повторам: живи гореа 14 луѓе“, рече Мицкоски.
Тој во продолжение упати директни критики кон обвинителот кој е во заминување, поврзувајќи ја одлуката со негови односи со претходната владејачка гарнитура.
„За жал, обвинителот којшто е во заминување, бидејќи, од тоа што сум информиран, е распишан оглас за избор на нов обвинител во Основното јавно обвинителство за гонење на организиран криминал, претпоставувам, своите должничко-доверителски односи кон претходната влада одлучува да до крај ги испорача и не му значи тоа што живи гореа 14 луѓе“, изјави премиерот.
Мицкоски оцени дека одлуката не претставува политичка амнестија и нагласи дека, доколку се појават нови детали или докази, случајот може повторно да биде отворен и постапката да продолжи.
„Секогаш можат да се појават нови детали коишто се поврзани со овој процес и секогаш овој процес може повторно да стане актуелен и практично пред јавноста да се покрене од самиот почеток“, истакна Мицкоски.
Тој додаде дека повеќепати ги коментирал одлуките на правосудните институции и оцени дека и оваа одлука е меѓу, како што ја нарече, „скандалозните“.
Мицкоски се осврна и на реакциите од опозицијата, посочувајќи дека постои промена во нивниот однос кон правосудните институции.
„До вчера, тие што критикуваа за односот на правосудните органи, сега ги фалат и се полни со хвалоспеви за нивната работа и таканаречената, во наводници, „објективност“, рече тој.
Според Мицкоски, особено загрижува тоа што во случајот со пожарот во модуларната болница во Тетово, во кој загинаа 14 лица, обвинителството не утврдило докази за сторено кривично дело.
© Vecer.mk, правата за текстот се на редакцијата
