Развојот на Коридорите 8 и 10 е дел од пошироката европска визија за поврзување на регионот, порача премиерот Христијан Мицкоски во обраќањето пред Генералното собрание на Обединетите нации.
Мицкоски ги поврза инфраструктурната поврзаност и економската безбедност со промените во глобалните синџири на снабдување.
„Нашата географија не мора да биде наша судбина. Таа може да биде наша предност ако изградиме институции и инфраструктура што ќе ја претворат нашата географска положба во поврзаност“, рече тој.
Премиерот посочи дека денес државите не размислуваат само за тоа каде нешто може да се произведе најевтино, туку и кој е доверлив партнер и дали енергијата и стоките ќе бидат достапни во услови на криза.
Во тој контекст, тој го истакна значењето на диверзифицираните транспортни правци, сигурната енергија и поблиските синџири на снабдување.
Според Мицкоски, подобрата инфраструктурна поврзаност може да придонесе регионот да биде повеќе интегриран, наместо да остане на геополитичката периферија.
© Vecer.mk, правата за текстот се на редакцијата
