Гостивар постепено излегува од актуната фаза на епидемијата, но здравствените власти остануваат на штрек. Министерот за здравство, Сашо Клековски, соопшти дека состојбата се стабилизира , но поради ризикот од појава на нови заразни заболувања надлежните продолжуваат со засилен епидемиолошки надзор. Според него, во последните четири дена дневно биле регистрирани меѓу 80 и 125 нови први прегледи, при што се уште не може прецизно да се утврди колку од нив се директно поврзани со епидемијата, а колку се дел од вообичаените здравствени состојби.
„Во јули, според повеќегодишните податоци, просекот во Гостивар бил околу 25 пријави за заразни заболувања, па ќе треба епидемиолошките анализи да покажат што е последица на епидемијата, а што е редовна појава“, рече Клековски.
Според последните податоци, регистрирани се 869 формални пријави, а епидемиолошки се анкетирани 602 лица. Министерот повторно апелираше граѓаните да соработуваат со здравствените служби за да може состојбата внимателно да се следи.
Во консултација со Комисијата за заразни болести е одлучено да се воведе здравствен надзор во постакутната фаза на епидемијата. Посебно внимание ќе биде насочено кон навремено откривање на хепатит А, хепатит Е и други заразни заболувања што би можеле да се појават по завршувањето на епидемијата.
Клековски најави дека до Центарот за јавно здравје, здравствените установи и матичните лекари ќе бидат испратени упатства за понатамошно постапување, како и насоки за информирање на населението.
Истовремено, Министерството за здравство започнува подетална анализа на текот на епидемијата, користејќи ги податоците од официјалниот систем за пријавување заразни болести, како и сите евидентирани случаи со дијагнози поврзани со ентероколит и слични заболувања од 1 јуни наваму.
„Целта е објективно и непристрасно да се утврди како се развивала епидемијата и како реагирал системот, по што јавноста ќе биде детално информирана“, изјави министерот.
© Vecer.mk, правата за текстот се на редакцијата
