Демографијата е нашата нова борба за Македонија и прашање од кое зависи нашиот национален опстанок, порача потпретседателот на Собранието, Антонио Милошоски, во своето празнично обраќање по повод 2 Август – Илинден.
Милошоски истакна дека современиот патриотизам не се мери само со историјата и спомениците, туку со одговорноста да се создаваат семејства и да се градат услови младите да останат и да се враќаат во татковината.
„Што ќе вредат спомениците, ако нема детски раце што ќе положат венец пред жртвата на Илинденците? Колку ќе вреди македонскиот јазик, ако нема кој да го говори и да им го пренесе на своите внуци? Ќе вредат ли училиштата, ако во нив нема детски џагор? Нашето востание не се пушката и Црешовото топче, туку одговорноста да се создаде семејство и да се воспитуваат одговорни поколенија. Демографијата е нашата нова борба за Македонија. Демографијата не е само статистика. Демографијата е бебешкиот плач и родителските солзи радосници“, истакна Милошоски.
Тој додаде дека инвестициите во инфраструктурата и економијата имаат смисла само доколку има млади за кои тие се градат.
„Можеме да градиме спортски сали, градинки и училишта. Може да создадеме раст и нови инвестициски проекти. Но, сето тоа има смисла само ако има млади на кои ќе го оставиме. Затоа грижата за семејството, особено за мајките и за децата, не смее да биде тема на еден мандат, на една влада или на една партија. Демографијата е тема што треба да нè обедини. Саможртвата на Питу Гули ни дава јасна обврска – да не бидеме генерацијата што наследила држава, а оставила празни домови и празни училишта. Питу Гули беше сопруг и татко на четири деца, кој загина бранејќи го токму она што му беше најсвето – семејството и неговата татковина Македонија“, нагласи потпретседателот на Собранието.
Во завршниот дел од своето обраќање, Милошоски упати порака и до младите и до иселениците ширум светот:
„Нашата задача не е да ги убедуваме младите да живеат во историските спомени. Нашата задача е да им оставиме држава во која ќе можат да ги создаваат своите спомени. Земја што ќе ја чувствуваат какa своја, во која ќе можат да основаат семејства и да ги растат своите деца. А оние што веќе заминале во странство – да имаат повеќе причини еден ден да се вратат. Убаво е Македонија да биде местото од кое потекнуваме. Но, уште поубаво е татковината да биде и местото кон кое заеднички се враќаме“, заклучи Милошоски.
© Vecer.mk, правата за текстот се на редакцијата
