Граничниот премин „Евзони“ на македонско-грчката граница се соочува со сериозни технички проблеми по удар од гром, кој предизвикал прекин на електричната енергија и го нарушил функционирањето на клучните системи на преминот.
Според објави во Фејсбук групата „Грчка инфо“, по невремето дошло до сериозни потешкотии во работата на преминот, при што патници јавуваат за долги задржувања и отежнат проток на сообраќај.
Како што се наведува, резервните агрегати што се користат како алтернативен извор на електрична енергија не се доволни за напојување на сите системи, што дополнително ја усложнува состојбата.
Граѓани кои вечерва треба да го користат преминот изразуваат загриженост поради неизвесноста и времетраењето на проблемите, особено поради зголемените колони и застојот.
Од надлежните служби во Грција засега нема официјални информации за обемот на дефектот и времето потребно за нормализирање на функционирањето на преминот.
„Во последниве години, имаше пожар во Евзонија, потоа штрајк на земјоделците, сега молња. Да не зборуваме за ЕЕС. Таа граница треба да се укине“ - коментираат патниците.
© Vecer.mk, правата за текстот се на редакцијата
