Учениците ќе ја почнат новата учебна година со обезбедени учебници, а најголемиот дел од нивната дистрибуција веќе е завршена, изјави министерката за образование и наука Весна Јаневска.
Во интервју за телевизија Сител, Јаневска истакна дека Министерството презело мерки за подобрување на системот за издавање и дистрибуција на учебниците, меѓу кои и нова законска рамка со која учебникарството е префрлено кај издавачките куќи.
- Дотогаш Министерството беше и печатница и учебникар, што беше тешко спроведливо и несоодветно. Сега тоа го префрливме кај издавачките куќи - нагласи Јаневска.
Таа посочи дека процесот е транспарентен, а сите документи се достапни на веб-страницата на Педагошката служба. Организирани биле и три онлајн семинари за училиштата за правилно спроведување на замената на старите и оштетени учебници.
Според Јаневска, во претходните години имало проблеми со дотраени и оштетени учебници поради несоодветно спроведување на процедурите, но очекува годинава тие да бидат надминати.
Таа додаде дека е зголемена свеста за одговорно користење на учебниците, а училиштата ќе добијат онолку примероци колку што ќе побараат. По извршените проверки, било потврдено дека дистрибуцијата на најголемиот дел од учебниците е завршена.
© Vecer.mk, правата за текстот се на редакцијата
