Инспекторите на Град Скопје досега изрекле околу 100 казни за граѓани кои фрлале комунален отпад во контејнерите по 22 часот, иако тоа е забрането.
Покрај граѓаните, санкции добиле и фирми, изречени се десетина казни, додека повеќе од 100 прекршители поминале со опомени.
Забраната важи од ноември 2025 година и се однесува на периодот од 22 часот навечер до 6 часот наутро. За оние што не ја почитуваат, предвидена е казна од 50 евра. Според податоците на градските власти, досега се наплатени над 2.000 евра по овој основ.
Од Град Скопје велат дека мерката веќе дава резултати, улиците се почисти, а граѓаните постепено ги менуваат навиките.
Контролите нема да запрат. Инспекторатот најавува засилено присуство на терен, со дежурства во три смени и фокус на критичните локации низ градот.
Во следниот период се планира и поставување видеонадзор, со цел полесно откривање на прекршителите.
Дополнително, донесена е одлука и деловните објекти, кафулиња, маркети и други фирми, да обезбедат сопствени контејнери за отпад, за да се намали притисокот врз оние што ги користат домаќинствата.
Насловната фотографија е дел од секојдневието на улицата Загребска 28, кај станбениот комплекс КТК, каде секојдневно се исфрла ѓубре и градежен шут од секој што реновира на Водно.
© Vecer.mk, правата за текстот се на редакцијата
