Невнимание при рутинска промена на масло во една од фритезите го предизвикало пожарот во скопскиот локал Baking Bread. Од локалот велат дека штетата е мала и дека очекуваат повторно да работат за неколку дена.
„Штетата е мала и очекуваме за неколку дена повторно да бидеме отворени“, соопштија од Baking Bread.
Од локалот посочуваат дека благодарение на брзата реакција на вработените и на навремената интервенција на Противпожарната бригада биле избегнати поголеми последици. Според нив, никој не бил повреден.
Во објавата реагираат и на тврдењата што се појавија на социјалните мрежи и на дел од порталите.
„Сакаме јасно да кажеме дека Baking Bread нема да побара ниту еден денар од осигурителна компанија. Штетата е мала и ќе ја санираме сами“, порачаа од локалот.
На крајот од објавата упатија благодарност до граѓаните за поддршката и до припадниците на Противпожарната бригада за брзата интервенција.
Пожарот избувна синоќа во локалот на улицата „Димитрие Чуповски“, кај „Рекорд“, во центарот на Скопје. Противпожарните екипи брзо го локализираа и го изгаснаа огнот. Полицијата го обезбедуваше местото на настанот.
© Vecer.mk, правата за текстот се на редакцијата
