Слниот ветер со моќ на торнадо кој го преживеа Скопје остави масовни последици врз приватниот и јавен имот. Еден од најоштетените јавни објекти во Скопје е базенот во Карпош, блиску до спорската сала Јане Сандански. Оштетувањето на покривот предизвикало пад на делови и во внатрешноста на просторот па санацијата која следи ќе биде комплетна, реконструкција на целиот објект.
Поради најавената реконструкција базенот нема да работи во наредните две години.
„Базенот и пред невремето беше во лоша состојба и му требаше итна санација. По невремето одлета кровот и сега нема да правиме никакви интервенции само на кровот, туку ќе биде затворен додека целосно не се реновира. Готов е проектот и во наредниот период ќе распишеме тендер за изведувач. Очекуваме градежните работи да почнат во ноември. Ќе се реконструира од темел, од машинската соба до кровот“, вели директорот Даниел Апостоловски.
Според проектната документација, реконстуркцијата треба да трае од 12 до 18 месеци. Со оглед дека базенот е затворен во јули и потребни ќе бидат неколку месеци за спроведување на тендерот, изборот на фирма и склучување договор, базенот ќе биде затворен за посетители околу две години.
Базенот беше реновиран во 2010 кога на власт беше ВМРО-ДПМНЕ.
© Vecer.mk, правата за текстот се на редакцијата
