КОЈ ГИ УЧИ ДЕЦАТА ЗА НАСИЛНИ КРУГОВИ? „Кој ќе влезе во кругот, добива ќотек“ – мајката на претепаното дете од Влае (ВИДЕО)

По бруталното претепување на 13-годишно дете на плоштадот „Делфина“ во скопската населба Влае, неговата мајка за „Скопје1“ изнесе нови вознемирувачки информации за наводна практика на насилство меѓу малолетници. Според сознанијата што ги добила, на плоштадот се формирал круг во кој деца физички напаѓале други деца што ќе поминеле низ него.

„Кружи таа варијанта дека на самиот плоштад ‘Делфина’ се формира некој круг, кој случајно ќе помине во тој круг, добива ќотек“, раскажа мајката, нагласувајќи дека станува збор за информации што ги слушнала, а не за нешто на што лично била сведок.

На прашањето дали овие сознанија ги споделила со полицијата, таа потврди дека ги пријавила.

„Да, го кажав на полицијата. Треба да се преземат многу големи мерки, затоа што ова сето излегува од контрола“, изјави мајката за „Скопје1“.

Нејзиното сведоштво доаѓа по нападот врз нејзиниот 13-годишен син, кој, според неа, бил опколен од група од околу 15 до 20 малолетници. Нападот започнал кога едно од децата му пристапило со зборовите „Е, овој може“, по што го турнало во круг и му удрило шлаканица. Потоа, како што раскажува мајката, останатите се нафрлиле врз него, го туркале од еден кон друг и го удирале со тупаници и клоци.

Мајката тврди дека при нападот бил употребен и боксирач, а нејзиниот син се здобил со повреди на главата, отоци, модринки, крвни подливи и два скршени заба.

Таа предупредува и на опасноста од носењето предмети што можат да предизвикаат сериозни повреди, особено кога станува збор за малолетници.

„Ние како родители треба да се запрашаме каде ни се децата, што носат со себе, дали се свесни што можат да направат“, порача мајката.

Според нејзиното сведоштво, последиците од нападот не се само физички. Детето се плаши повторно да излезе од дома, а семејството планира да побара психолошка помош поради преживеаната траума.

Засега нема независна потврда дека на плоштадот „Делфина“ постои организирана практика на формирање круг во кој се тепаат деца. Станува збор за информации што ги пренесува мајката на нападнатото момче, а за кои таа тврди дека ја известила полицијата.

Фото+Видео: Скопје1