Уште две недели остануваат до истекот на мерката куќен притвор за поранешниот прв вицепремиер Артан Груби, кој е осомничен во истрагата за случајот поврзан со Државната лотарија. Времетраењето на истрагата повторно стана предмет на политички препукувања. Од ВРЕДИ го обвинија Обвинителството дека постапката се одвива со бавно темпо и побараа од институцијата да објасни зошто сè уште нема обвинение во случајот.
„Артан Груби не е било каков поранешен функционер. Тој е црната кутија на ДУИ. Тој знае кој ги влечел конците, кој ги делел зделките и во чии џебови завршувале парите од коцкањето“, обвинија од ВРЕДИ.
Од коалицијата побараа Обвинителството да ја информира јавноста до каде е постапката и што е преземено по наодите на американските власти.
ДУИ ги отфрли обвинувањата и ги оцени како политички притисок врз правосудството. Од партијата на Али Ахмети велат дека ВРЕДИ преку ваквите напади се обидува да го прикрие сопствениот, како што наведуваат, политички неуспех.
Во меѓувреме, во јавноста сè уште нема обвинение против Груби во предметот. Од Обвинителството досега е соопштено дека осомничениот и неговата одбрана се запознаваат со доказите прибавени во текот на истражната постапка.
Груби ја напушти земјата во декември 2024 година, а по повеќе од една година, на 23 февруари 2026 година, се предаде на граничниот премин Блаце. По неговото враќање во земјава му беше определена мерка куќен притвор.
Во истиот предмет осомничен е и поранешниот директор на Државната лотарија, Перпарим Бајрами, кој и натаму е во бегство, како и други лица.
Според досегашните наводи на Обвинителството, со истрагата се опфаќаат злоупотреби поврзани со Државната лотарија, при што штетата се проценува на повеќе од 8 милиони евра.
Предметот сега повторно е во центарот на политичките реакции, а истекот на мерката за куќен притвор дополнително го отвора прашањето што ќе се случи со постапката доколку обвинителството дотогаш не поднесе обвинение.
Сепак, дали и кога ќе биде поднесено обвинение ќе зависи од текот на истрагата и од одлуката на надлежното обвинителство.
© Vecer.mk, правата за текстот се на редакцијата
