ИСТОРИСКА ИНИЦИЈАТИВА ВО ЕУ! – 11 моќни земји, предводени од Германија и Франција, против ветото влез во ЕУ

Дали Европската Унија конечно ќе им стави крај на вештачките блокади и соседските уцени? Новата дипломатска офанзива во Брисел дава силен сигнал дека на националното самоволие му доаѓа крајот.

Група од 11 земји-членки предводени од Франција и Германија упатија писмо до новата шефица за надворешна политика на ЕУ, Каја Калас, со барање за итно активирање на т.н. „пасерел клаузула“ (Член 31). Овој механизам овозможува преминување од консензус кон гласање со квалификувано мнозинство во надворешната политика, чекор што практично ќе ја оневозможи Бугарија во иднина да го блокира македонскиот евроинтегративен пат.

Како ЕУ планира да ги спречи блокадите?

Покрај воведувањето на „конструктивна воздржаност“, писмото потпишано од Австрија, Белгија, Данска, Финска, Франција, Германија, Луксембург, Холандија, Романија, Шпанија и Шведска дефинира нови правила за спречување на уцените:

• Забрана за условување: Одлуките за проширување и надворешна политика повеќе нема да смеат да се поврзуваат со прашања што не се фундаментално поврзани со нив (како историските и идентитетските спорови).
• Драстично поскапување на ветото: Доколку некоја земја сепак реши да искористи вето, ќе биде правно обврзана јавно да поднесе „образложени витални причини од национален интерес“. Со ова се укинува праксата на тивки и неоправдани блокади.
• Заби за „искрената соработка“: Принципот на солидарност меѓу членките станува задолжителна норма за спречување на соло-акции.

Паралелно со ова, Франција и Германија туркаат план за централизација на дипломатската мрежа на ЕУ со цел Унијата да може да реагира за броени часови, наместо да биде заложник на повеќемесечни преговори.

„Правната рамка за сите пет принципи веќе постои во договорите на ЕУ. Прашање е само на наша волја да ги спроведеме“, се истакнува во писмото до Каја Калас.

Оваа реформска офанзива е директна потврда за ставовите на македонската дипломатија дека проширувањето на ЕУ мора да се базира врз реални заслуги и европски вредности, а не врз билатерални хирови.