Македонија до крајот на викендот останува под влијание на силен африкански топлотен бран, кој освен високи температури носи и голем облак од сахарска прашина и песок.
Метеоролозите предупредуваат дека од петок (28 август) до недела атмосферата ќе биде значително заматена, со намалена видливост и карактеристична жолтеникава боја на небото, а ситните честички од пустината може да се таложат врз автомобилите и објектите.
Истовремено, топлотниот бран ќе донесе високи дневни температури кои во Скопје и низ земјата ќе надминуваат 36 степени, како и неподносливи тропски ноќи каде температурата нема да се спушти под 20 степени, особено во Повардарието и Југоисточниот регион.
Комбинацијата од жештина, спарност и честички во воздухот може сериозно да им го отежне дишењето на метеоропатите, постарите лица и луѓето со респираторни проблеми. На овие категории граѓани им се препорачува да избегнуваат физичка активност и подолг престој на отворено во најжешките периоди од денот.
© Vecer.mk, правата за текстот се на редакцијата
