Јавен обвинител од Основното јавно обвинителство Скопје издаде Наредба за обдукција на телото на 18-годишното момче кое беше убиено во скопското село Бојане.
Како што информираат од ОЈО Скопје, во тек е прибирање на доказите, а веќе се издадени и наредби за вештачење на пронајдените траги, како и за споредбени анализи на оружјето со кое се смета дека е извршено делото.
За убиството постои основано сомнение против 19-годишник од истото село, кој веќе е лишен од слобода. Тој се сомничи за кривично дело „Убиство“ според член 123 став 1 од Кривичниот законик.
„Имајќи предвид дека прибирањето на доказите е во тек, а постојат околности кои укажуваат на опасност од бегство, можност за влијание врз сведоци и прикривање на трагите, како и ризик осомничениот да изврши друго кривично дело, јавниот обвинител до судијата на претходна постапка поднесе предлог за определување мерка краткотраен притвор во траење од 48 часа“, соопштуваат од ОЈО Скопје.
Оваа мерка се бара со цел да се обезбедат сите релевантни докази пред и формално да биде отворена истражната постапка.
© Vecer.mk, правата за текстот се на редакцијата
