Патот на Том Круз до холивудската слава не започнал на филмски сет. Пред да стане актерска ѕвезда, тој работел како помошник на домар во една зграда на њујоршкиот Горен Вест Сајд, пренесува „Еј-би-си“.
Во разговор за емисијата „Добро утро, Америка“ (Good Morning America), Круз откри дека работата му била далеку од едноставна. Бил задолжен за одржување на зградата, поправки и разни секојдневни задачи, па често морал да се снаоѓа со најразлични проблеми.
„Морав да одам кај станарите и да им поправам работи. Бев мајстор за сè“, раскажа Круз.
Тој објасни дека уште додека растел работел различни работи и дека не се плашел од задачи што барале физичка работа или практични вештини.
„Додека растев, работев многу различни работи. Го поправав греењето, секој ден го чистев мразот од влезот и се грижев ѓубрето редовно да се изнесува. Се грижев за сè што беше потребно“, рече актерот.
Истата посветеност ја носи и во глумата
На прашањето дали на таа работа ѝ пристапувал со истата сериозност со која денес ѝ пристапува на глумата, Круз одговорил во свој стил.
-Знам. Не можам да си помогнам. Едноставно велам: „Сакам да го поправам тоа. Јас ќе го решам!“
Изгледа дека навиката да бара решение за секој проблем му останала и денес. Круз со години е познат по тоа што е исклучително вклучен во подготовката и реализацијата на своите филмови, а неговиот пристап кон создавањето ликови подразбира внимание и кон најситните детали.
За „Копач“ целосно го променил изгледот
Круз наскоро ќе се појави во филмот „Копач“ (Digger), во режија на Алехандро Гонзалес Ињариту. Во него го толкува ликот на ексцентричен нафтен тајкун кој е одговорен за еколошка катастрофа.
За потребите на улогата актерот значително го променил својот изглед со помош на протетика, а работел и на усовршување на јужниот акцент.
Сепак, Круз нагласил дека ликот не е заснован на вистинска личност.
„Филмот не е заснован на никого“, рекол тој во поткастот „Нови височини“ (New Heights), кој го водат браќата Тревис и Џејсон Келси.
За начинот на кој ги гради своите ликови, актерот зборувал и за време на средба со новинари во студиото на компанијата „Ворнер брос“ (Warner Bros.) во Калифорнија.
Изгледот е дел од создавањето на ликот
Круз објаснил дека за него создавањето лик е процес во кој треба да се пронајде вистинската рамнотежа меѓу хуморот, драмата и начинот на кој приказната ќе стигне до публиката.
„Кога создаваме ликови, бараме хумор, драма и одредени структури, а потоа се прашуваме како тоа да ѝ го пренесеме на публиката. Без разлика дали станува збор за Лес Гросман од филмот „Тропска грмотевица“ (Tropic Thunder) или за улогите во филмовите „Интервју со вампирот“ (Interview with the Vampire), „Колатерал“ (Collateral) и „Ризичен бизнис“ (Risky Business), секогаш барам начин како тоа да го прикажам“, објаснил актерот.
Тој додал дека физичката трансформација, изгледот и шминката се важни алатки во процесот на градење на ликот.
„Физичкиот изглед и шминката се алатки што ги откривате додека учите како најдобро да го доловите ликот“, рекол Круз.
Филмот „Копач“ (Digger) во светските кина треба да пристигне на 2 октомври.
© Vecer.mk, правата за текстот се на редакцијата
