Најмалку пет лица се водат како исчезнати, а над 650 се директно погодени откако разорни бујични поплави ненадејно го погодија округот Горка во централен Непал, носејќи пред себе куќи, мостови и комплетна инфраструктура.
Според податоците на Непалската национална управа за справување со ризици од катастрофи, досега се спасени 95 лица, меѓу кои и девет странски државјани, додека оштетени се 204 домови. Најтешко е погодена руралната општина Чумнубри, каде според локалните власти најмалку две села се целосно збришани од лицето на земјата, а водите однеле и десетици мостови. Меѓу исчезнатите се петмина сточари, а во катаклизмата настрадале и околу 100 грла добиток.
Целосно отсечени подрачја, спасувачките тимови се пробиваат од воздух
На терен се ангажирани над 700 припадници на безбедносните сили, а непалската војска распореди четири хеликоптери бидејќи патиштата се целосно уништени.
– Целата рурална општина сега е отсечена, а воздушниот транспорт е единствениот преостанат начин да се стигне до неа, изјави административниот челник Нарајан Прасад Сапкота.
Дека водата надошла со застрашувачка брзина сведочат и преживеаните. Мештанинот Суна Гурунг раскажа дека го разбудил телефонски повик од соседно село едвај еден час пред надоаѓањето на водниот бран, додавајќи дека нивото на реката се кренало драматично за само десет минути, оставајќи ги луѓето без никакво време за бегство освен брза инстинктивна евакуација.
© Vecer.mk, правата за текстот се на редакцијата
