Од утре, Европската Унија ја укинува досегашната политика на ослободување од царина за мали пратки (de minimis) и воведува фиксна царинска такса од три евра по артикл за пакетите што пристигнуваат од земји надвор од ЕУ. Оваа мерка, која директно ќе ги поскапи нарачките од популарните кинески платформи како Temu, AliExpress и Shein, дополнително ќе влезе и во основата за пресметка на ДДВ при увоз.
Досега потрошувачите во ЕУ можеа да купуваат стоки во вредност до 150 евра без никакви царински давачки. Сепак, со оглед на огромниот бран пратки – чиј број експлодираше од 1,3 милијарди во 2022 година на дури 5,9 милијарди во 2025 година (од кои 90 отсто доаѓаат од Кина) – Брисел одлучи радикално да го заштити европскиот пазар.
Покрај економската заштита на домашните трговци, главна причина за оваа одлука е и безбедноста. Најновото истражување на ЕУ покажа шокантен податок дека дури 60 проценти од онлајн производите увезени од надвор од блокот не се во согласност со законите на ЕУ и се потенцијално опасни за здравјето. Европскиот комесар за правда, Мајкл Мекграт, изјави дека е згрозен од опасностите на производите кои досега непречено влегуваа на пазарот.
Дека ситуацијата е сериозна покажува и фактот што минатиот месец регулаторите на ЕУ веќе ја казнија платформата Temu со огромни 200 милиони евра поради тоа што не успеала да ја спречи продажбата на нелегални и опасни производи. Новата такса нема да се применува за стоки кои се нарачани од земјите членки на ЕУ.
© Vecer.mk, правата за текстот се на редакцијата
