Од помошта по раѓањето и почестиот контакт до интересот за училишниот живот на внуците – истражувањата откриваат неколку причини поради кои децата често создаваат поблиска врска со семејството од мајчина страна.
Иако не постои правило според кое децата мора да бидат поблиски со бабата и дедото од едната страна на семејството, истражувањата укажуваат дека тоа често се случува.
Причините се различни – од начинот на кој е организиран семејниот живот до тоа кој од бабите и дедовците е повеќе присутен во првите години од животот на детето.
Родителите често се посредници во односот
Една од причините може да биде улогата на родителите, особено мајката, во организирањето на семејниот живот.
И покрај промените во поделбата на домашните обврски, мајките во многу семејства сè уште почесто ги организираат активностите на децата и одржуваат контакт со поширокото семејство. Поради тоа, може почесто да се случува децата да поминуваат време со бабата и дедото од мајчина страна.
Секако, близината зависи и од други фактори. Важна е географската оддалеченост, но и работните обврски, здравјето, финансиските можности и карактерот на бабите и дедовците.
Влијае и бројот на внуци. Ако ги има многу, можеби е потешко бабата и дедото да поминуваат доволно време со секое дете за да изградат навистина блиска врска.
Врската може да започне уште по раѓањето
Бабите и дедовците од мајчина страна почесто можат да бидат вклучени во периодот околу раѓањето, а бабата често е меѓу луѓето кои ѝ помагаат на мајката во првите недели со новороденчето.
Токму тие рани контакти создаваат можност бабата и дедото почесто да го гледаат внукот, да му помагаат на семејството и постепено да создадат блиска врска.
Поддршката од бабите и дедовците може да биде важна и за самата мајка. Истражувањата покажуваат дека практичната и емоционалната помош од поширокото семејство може да биде значајна во периодот по раѓањето, особено кога родителот се чувствува осамено или преоптоварено.
Блискоста може да продолжи и во тинејџерските години
Интересно е што оваа поврзаност не мора да исчезне кога детето ќе порасне. Истражувањата со тинејџери покажуваат дека бабите и дедовците од мајчина страна често остануваат важни личности во поширокото семејство. Во студија со британски тинејџери, бабата од мајчина страна била издвоена како особено важен член на поширокото семејство, а веднаш по неа бил дедото од мајчина страна.
Тинејџерите како причина ја наведувале заинтересираноста на бабите и дедовците за нивниот живот, особено за училиштето, иднината и секојдневните проблеми.
За многу млади луѓе, бабата може да биде личност со која разговараат за иднината, добиваат совет или едноставно се чувствуваат слушнати.
Сепак, не е пресудно и секогаш присутно од која страна на семејството се бабата и дедото
Најважниот фактор за создавање блиска врска не е презимето, роднинската страна или тоа кој е „по важен“ во семејството.
Бабите и дедовците кои се заинтересирани за животот на детето, го слушаат, поминуваат време со него и ги почитуваат границите поставени од родителите имаат поголема можност да изградат силна и долготрајна врска.
Затоа, иако истражувањата покажуваат одредена предност во блискоста со семејството од мајчина страна, секое семејство е различно. На крајот, блискоста се гради со присутност, време, внимание и вистински интерес за детето, без оглед на тоа од која страна на семејството доаѓаат бабата и дедото.
© Vecer.mk, правата за текстот се на редакцијата
