Нема двоумење дека бананите се одличен извор на калиум. Банана со средна големина содржи околу 420 милиграми калиум, што е околу 12 до 16 проценти од вашите дневни потреби (2.600 мг за жени и 3.400 мг за мажи).
Калиумот е минерал и електролит кој има неколку многу важни улоги во одржувањето на општото здравје. Му помага на телото да остане хидрирано, ја поддржува функцијата на клетките и нервите и одржува здраво функционирање на мускулите и срцето, но повеќето Американци не внесуваат доволно калиум секој ден.
Ако сакате од бананата да добиете што повеќе калиум, дали е навистина важно во кое време од денот ја јадете? Прашавме регистрирани диететичари за нивното мислење – а одговорот би можел да ве изненади, пишува EatingWell.
Оптимално време за јадење банани
Вистината е дека не постои едно „најдобро време“ или „најлошо време“ за јадење банана за да се внесе максимумот калиум. Причината е тоа што времето на конзумирање нема големо влијание врз апсорпцијата на калиумот, за разлика од некои други хранливи материи.
„Нашето тело го апсорбира калиумот пасивно, како сунѓер. Кога ќе апсорбира доволно или ќе достигнете оптимално ниво, апсорпцијата станува ограничена“, вели диететичарката Дајан Хан.
Со други зборови, вашето тело прилично добро одредува што му е потребно, без оглед на тоа кога јадете храна богата со калиум.
„Кога ќе изедете банана, вашето тело ќе одреди што е најдобро да направи во тој момент за да ја одржи рамнотежата на хранливите материи, за да не почувствувате никакви негативни симптоми, како низок крвен притисок, вртоглавица или болки во мускулите“, вели диететичарката Трејси Локвуд Бекерман.
Што влијае врз апсорпцијата на калиумот?
Калиумот се апсорбира во тенкото црево, а телото главно добро го користи она што го внесувате. Сепак, одредени фактори можат да влијаат врз нивото на калиум – како високиот внес на натриум, некои лекови, повраќањето или дијарејата, како и основните здравствени состојби кои влијаат врз начинот на кој телото го задржува или излачува калиумот.
Замислете го нивото на калиум како клацкалка, вели Бекерман.
„Ако јадете храна со која внесувате премногу калиум во телото, излачувањето ќе биде големо, па нивоата ќе останат стабилни. Ако внесот е премногу низок, излачувањето ќе биде мало, па калиумот ќе се чува во телото“, вели таа.
Бубрезите вршат голем дел од ова балансирање. Ако вашите залихи на калиум се ниски, телото ќе ја задржи потребната количина калиум кога јадете храна богата со овој минерал. Но, ако нивоата на калиум се соодветни, телото ќе го излачи вишокот преку урината.
Другите хранливи материи што ги јадете заедно со бананите немаат големо влијание врз апсорпцијата на калиумот.
„Калиумот делува самостојно како електролит кој си ја врши својата работа, без оглед на тоа дали се внесува со други макронутриенти како протеини, масти и јаглехидрати“, вели Бекерман.
© Vecer.mk, правата за текстот се на редакцијата
