Повеќе од 200 смртни случаи пријавени се до британскиот регулатор поради сомневање за поврзаност со лекови од групата GLP-1, кои се користат за слабеење и лекување дијабетес. Британската Агенција за лекови и здравствени производи (MHRA) нагласува дека овие пријави сами по себе не докажуваат дека лековите биле причина за смртта, информира „Скај њуз“.
Според податоците од системот Yellow Card, во Велика Британија биле регистрирани повеќе од 158.000 пријави за сомнителни несакани ефекти и други несакани реакции поврзани со овие лекови. Во системот можат да пријавуваат пациенти, членови на нивните семејства и здравствени работници.
Најголем број пријави се однесуваат на тирзепатидот, активната состојка на лекот Mounjaro. За него биле евидентирани 106.189 сомнителни несакани реакции и 120 смртни случаи. Кај семаглутидот, кој се користи во лековите за слабеење Wegovy и за дијабетес Ozempic и Rybelsus, биле пријавени 48.089 несакани реакции и 59 смртни случаи.
Лираглутидот, кој за слабеење се продава под името Saxenda, бил поврзан со 4.491 пријава за можни несакани реакции и 37 смртни случаи. Вкупно, кај овие три активни супстанции биле регистрирани 216 смртни случаи за кои постоел сомнеж дека можеби се поврзани со терапијата.
Сепак, британскиот регулатор предупредува дека бројот на пријави не претставува доказ за причинско-последична врска. Тоа значи дека лицето кое го пријавило случајот се посомневало дека лекот можеби бил поврзан со несаканата реакција или со смртниот исход, но не е потврдено дека токму лекот ја предизвикал состојбата.
Најголем дел од пријавените несакани реакции се однесуваат на проблеми со дигестивниот систем. Кај тирзепатидот биле регистрирани повеќе од 65.000 вакви пријави, додека кај семаглутидот нивниот број достигнал речиси 29.000. Пријавени биле и нарушувања на нервниот систем, а кај тирзепатидот повеќе од 2.000 случаи се однесувале на психијатриски нарушувања.
Меѓу почестите несакани ефекти на GLP-1 лековите се мачнина, повраќање, дијареја и запек. MHRA неодамна ги засили и предупредувањата за ризикот од акутен панкреатитис, вклучително и ретки тешки и смртоносни случаи.
Од агенцијата велат дека безбедноста на овие лекови континуирано се следи преку пријави од пациенти и здравствени работници, како и преку научни истражувања. Доколку се утврдат нови ризици, пациентите и медицинските лица ќе бидат известени.
Според досегашните достапни докази, MHRA оценува дека придобивките од GLP-1 лековите ги надминуваат потенцијалните ризици кога тие се користат правилно и во согласност со одобрените медицински индикации.
© Vecer.mk, правата за текстот се на редакцијата
