Дали подебелата тоалетна хартија е навистина подобриот избор? Иако производителите често ги истакнуваат мекоста и поголемиот број слоеви како главни предности на своите производи, стручњаците предупредуваат дека бројот на слоеви не е пресуден кога станува збор за хигиената и здравјето на кожата.
Шарена амбалажа, примамливи мириси и ветувања за неверојатна мекост – производителите прават сè за да нè убедат дека трислојната или четирислојната тоалетна хартија е најдобриот избор. Сепак, лекарите воопшто не се согласуваат со тоа!
Познатиот руски проктолог Вјачеслав Булаев истакнува дека не постои значајна разлика во ефикасноста на чистењето меѓу двослојната и четирислојната тоалетна хартија, ниту пак дека едната е подобар избор од другата за лица со чувствителна или проблематична кожа.
Лекарите предупредуваат дека тоалетната хартија, без оглед на бројот на слоеви, не може целосно да ја исчисти кожата. Ако веќе имате хемороиди или ситни анални фисури, нејзиното користење може дополнително да ја иритира и повреди чувствителната регија. Со други зборови, ветената мекост не може да го надомести механичкото триење што настанува при бришењето.
Трикот на лекарите: Не е важен бројот на слоеви, туку структурата
Ако имате чувствителна кожа, наместо да ја избирате тоалетната хартија според бројот на слоеви, обрнете внимание на нејзината структура.
Стручњаците препорачуваат хартија со релјефна текстура (со втиснати шари), бидејќи е понежна кон кожата и може да ја намали иритацијата.
Четири слоја се ноќна мора за цевките!
Многумина веруваат дека подебелата тоалетна хартија воедно е и подобра, но тоа не е секогаш случај.
Поради поголемата количина целулоза, четирислојната хартија поспоро се разложува во вода. Во постари инсталации или домаќинства со послаб притисок на водата, тоа може да го зголеми ризикот од затнување на цевките.
Од друга страна, двослојната и трислојната тоалетна хартија главно побрзо се распаѓаат во вода, па често се попогоден избор за домашната канализација.
Едноставен тест
Ставете парче тоалетна хартија во чаша со вода. Ако ниту по две до три минути не се распаѓа или не почнува да се раздвојува, постои можност поспоро да се разложува и во канализацискиот систем, посебно ако цевките се стари или тесни.
Мирисите и боите можат да предизвикаат иритации
Обоените и парфимираните тоалетни хартии содржат дополнителни бои и мириси кои кај одредени лица можат да предизвикаат иритација на кожата, чешање или алергиски реакции.
Затоа стручњаците препорачуваат лицата со чувствителна кожа, склоност кон алергии или чести иритации да избираат обична, непарфимирана бела тоалетна хартија без додадени бои и мириси.
Ваквиот избор може да помогне во намалувањето на ризикот од непријатни реакции, посебно во интимната регија.
Што препорачуваат лекарите како подобра алтернатива?
Лекарите и проктолозите истакнуваат дека миењето со вода, кога и да е можно, е понежен и поефикасен начин за одржување на интимната хигиена отколку користењето тоалетна хартија.
Водата може подобро да ги отстрани нечистотиите, со помал ризик од иритација на чувствителната кожа.
Ако тоа не е можно, добра алтернатива може да биде влажната тоалетна хартија или влажните марамчиња наменети за интимна хигиена, но важно е да се избираат производи без алкохол и додадени мириси, бидејќи се благи кон кожата и ја намалуваат можноста за иритација.
© Vecer.mk, правата за текстот се на редакцијата
