Спасувањето животни во иднина ќе биде интегрирано во плановите за цивилна заштита во Португалија: почнувајќи од 8 август, операциите за потрага, спасување и помош на животните ќе бидат обединети со активностите на општинската цивилна заштита. Ова е суштината на декретот објавен на 3 август 2026 година, а оваа уредба наложува и планирање вонредни решенија насочени кон потрага, спасување и обезбедување помош за животните за време на природни катастрофи или несреќи.
Уредбата го менува Рамковниот закон за цивилна заштита за да се редефинира цивилната заштита како активност што се спроведува со цел спречување на колективните ризици својствени за сериозни несреќи или катастрофи, ублажување на нивните последици и заштита и пружање помош на луѓето, животните и имотот во опасност кога ќе се случат такви ситуации. Општинските активности на цивилната заштита во Португалија отсега ќе вклучуваат планирање вонредни решенија, кои опфаќаат потрага, спасување и помош, како и евакуација, сместување и снабдување на животните во општините.
Како што објасни премиерот Луиш Монтенегро за време на дебатата во Собранието на Републиката, причината за оваа законска измена е емоционалната поврзаност што луѓето ја имаат со животните: таа понекогаш доведува до тоа поединци да одбиваат евакуација од своите домови за време на вонредни или опасни ситуации, бидејќи сакаат и нивните миленици да бидат третирани на ист начин.
Уредбата го додава планирањето вонредни решенија, насочени кон потрага, спасување, помош, евакуација, сместување и снабдување на животните, меѓу основните цели на цивилната заштита.
Со уредбата се менува составот на Националната комисија за цивилна заштита и се вклучува претставник за здравје и добросостојба на животните именуван од Генералната дирекција за храна и ветеринарство на Португалија (DGAV). Дирекцијата го менува и составот на окружните комисии за цивилна заштита за да се вклучи претставник за здравје и добросостојба на животните именуван од DGAV, пренесува Theportugalnews.
Се менува и составот на општинските одбори за цивилна заштита со цел вклучување на претставник од општинската ветеринарна здравствена власт и претставник од правно конституирани субјекти признаени од општината, кои се вклучени во потрага и спасување, одговор во вонредни ситуации, помош, евакуација, сместување или обезбедување залихи за животните.
Преку измената на Интегрираниот систем за цивилна заштита и помош, со закон се менува конфигурацијата на операциите: претходно таа ги опфаќаше зоната на инцидентот, зоната за поддршка и зоната за концентрација и резерва (каде што се наоѓаат транзитните точки). Местото на операциите сега вклучува и четврта зона ‒ зона за прием и концентрација на животни, каде што привремено се стационирани расположливите средства и ресурси и каде што се одржува системот за логистичка поддршка за сместување, спасување и тријажа на животните.
© Vecer.mk, правата за текстот се на редакцијата
