Дополнетиот предлог за измени и дополнувања на Буџетот за 2026 година се најде пред пратениците во Собранието, а министерката за финансии Гордана Димитриеска Кочоска во своето експозе истакна дека овој документ претставува навремено и одговорно усогласување на државните каси со новите глобални економски околности. Таа посочи дека преку прифатените амандмани се обезбедени дополнителни средства за повеќе ранливи категории, но и затни проекти на локално ниво.
Финансискиот план предвидува вкупните приходи да се ревидираат на 379,5 милијарди денари, додека расходите се проектирани на 425,8 милијарди денари. Дефицитот е поставен на 4,1% од БДП, односно 46,3 милијарди денари, што според министерката е дефицит насочен исклучиво кон финансирање развој.
Покрај стандардните буџетски ставки, во ребалансот се вградени и конкретни финансиски средства за вонредни состојби и социјални иницијативи.
Министерката Димитриеска Кочоска од собраниската говорница ги образложи клучните дополнувања направени преку амандманската расправа:
„Со дополнетиот ребаланс се обезбедени 6 милиони денари за транспорт на вода за населението во Гостивар поради прогласената епидемија, 1 милион денари за Управата за извршување на санкции; 10 милиони денари во МОН за реконструкција на факултети, 12 милиони денари во Јавното обвинителство за продолжување на лиценца за набавка на софтвер, 170 милиони денари се во Министерство за земјоделство, шумарство и водостопанство за изградба на дистрибутивни центри во Скопје и Струмица и реновирање и адаптација на зградата на ИПАРД во износ од 170.000.000 денари;.“
Макроекономски показатели: Економски раст од 3,5% и пад на невработеноста
Министерката потенцираше дека и покрај геополитичките шокови и ценовните притисоци од странство, домашната економија покажува отпорност. Во првиот квартал е забележан раст на БДП од 3,1%, а за цела 2026 година се проектира реален раст од 3,5%.
Осврнувајќи се на пазарот на труд и инфлацијата, таа ги изнесе следните очекувања:
Вработеност и плати: Стапката на невработеност е намалена на 11,3%, додека за цела 2026 година се очекува просечната нето-плата да порасне за 8,3%.
Инфлација: Просечната инфлација во првата половина од годината изнесувала 4,1%, а проекцијата за цела 2026 година е ревидирана на 4,5% поради движењата на светските пазари.
Странски инвестиции: Директните странски инвестиции во првите месеци достигнаа 218,6 милиони евра, што е скок од 46,8% во однос на лани.
Рекорден скок на капиталните инвестиции
Во фокусот на овој ребаланс, според пораките од Министерството за финансии, е засилувањето на капиталните проекти. Ставката за капитални расходи достигнува околу 46 милијарди денари, што е зголемување за 14,3% во споредба со првичниот буџет.
Како што појасни министерката, овие средства се наменети за големите патни и железнички коридори (Коридор 8 и 10-д, автопатот Скопје – Блаце), пречистителната станица во Скопје, како и за проекти во општините, училиштата и здравството.
За изворот на финансирање и враќањето на долговите, Димитриеска Кочоска подвлече:
„Проектираниот дефицит за 2026 година во износ од 46,3 милијарди денари, како и обврските за отплата на долг во вкупен износ од 76,4 милијарди денари ќе се финансираат преку комбинација на домашно и странско задолжување.“
На крајот, таа упати повик до сите пратеници да го поддржат дополнетиот ребаланс, оценолувајќи дека тој овозможува непречено функционирање на државните институции, раст на платите и реализација на клучните инфраструктурни зафати.
© Vecer.mk, правата за текстот се на редакцијата
