Германската влада се обидува да го спречи „Фолксваген“ да ги затвори своите фабрики во земјата, но во исто време нагласува дека сите одлуки за реструктуирање се во надлежност на самиот автомобилски гигант. Портпаролот на владата во понеделник појасни дека целта е да се создадат охрабрувачки рамковни услови за фабриките да останат профитабилни, но дека таквите одлуки на крајот мора да се донесат на комерцијална основа, пишува „Анадолу“.
Според медиумските извештаи, „Фолксваген“ размислува за затворање на четири фабрики во Германија и намалување на бројот на вработени за дури 100.000 на глобално ниво.
Компанијата наводно се обидува да се справи со притисокот од кинеската конкуренција, американските царини и слабеењето на побарувачката низ цела Европа. Таквото реструктуирање, кое би било едно од најголемите во историјата на компанијата, претставува нов ризик за нестабилната германска економија и федералната влада, која се обидува да го оживее растот.
Отпор на акционерите и синдикатите
Се очекува плановите, кои сè уште не се официјално потврдени од „Фолксваген“, да наидат на силен отпор од синдикатите и владата на Долна Саксонија, вториот најголем акционер на производителот на автомобили.
Германската федерална влада, за разлика од покраинската влада, нема сопственички удел во „Фолксваген“. Предлозите за реструктуирање треба да бидат разгледани на состанокот на надзорниот одбор на 9 јули, на кој ќе учествуваат и претставниците на работниците.
Клучно прашање во плановите за реструктуирање се однесува на фабриката на Фолксваген во Оснабрик. Според извештаите, компанијата планира да го прекине производството таму во 2027 година и да го препушти објектот на израелската одбранбена компанија Рафаел за производство на компоненти од противракетниот систем „Железна купола“.
Тој предлог, наводно, бил блокиран од Катарската инвестициска управа (QIA), третиот најголем акционер на Фолксваген со 17 проценти од правото на глас, поради тензиите меѓу Доха и Израел. Иако федералната влада и Долна Саксонија ја поддржуваат предложената конверзија, на проектот се спротивставува и дел од локалното население.
„Неодговорни закани“
Раководството на Фолксваген веќе ги информирало претставниците на вработените дека претходно договорените намалувања на работни места нема да бидат доволни за постигнување на финансиските цели на компанијата.
Медиумските извештаи за можни намалувања на околу 100.000 работни места од вкупно 657.000 низ целиот свет предизвикаа остри критики од моќниот синдикат IG Metall и работничкиот совет на Фолксваген, кои ги опишаа плановите во заедничка изјава како „неодговорни закани“.
IG Metall е огромен индустриски синдикат кој ги опфаќа клучните сектори на германската економија: метална и електроиндустрија, автомобилска индустрија, челик, текстил, дрво, пластика, занаетчиство, услуги и дел од ИТ. Самиот синдикат наведува дека има повеќе од 2,2 милиони вработени, што го прави најголемиот германски синдикат и еден од најсилните индустриски синдикати во Европа.
„Ќе ги искористиме сите средства што ни се на располагање за да ги запреме овие напади врз правата на вработените, Законот за „Фолксваген“, принципите на ко-одлучување и нашите производствени капацитети“, рекоа тие.
Претставниците на работниците го повикаа менаџментот да се фокусира на конкурентни производи, нови технологии и сигурност на работното место, наместо на она што го нарекоа „слеп активизам“.
© Vecer.mk, правата за текстот се на редакцијата
