Светските цени на храната пораснаа втор месец по ред во март, што е највисоко од септември 2025 година. Сите категории се зголемија, објави денес Организацијата за храна и земјоделство на Обединетите нации (ФАО).
Индексот на цените на храната (FFPI) на ФАО, кој ги следи месечните движења на цените на основните земјоделски производи на светскиот пазар, се искачи на 128,5 поени, што е за 2,4 проценти повеќе отколку во февруари.
Индексот на цените на житарките се зголеми за 1,5 проценти во споредба со февруари, на 110,4 поени, бидејќи пченицата порасна за 4,3 проценти, а цените на пченката, јачменот и сиракот исто така се зголемија, додека цените на оризот паднаа за три проценти поради послабата побарувачка и повисоките залихи.
Дополнително, вредноста на индексот на растителните масла се зголеми за 5,1 процент и достигна 183,1 поени, што е највисоко ниво од средината на 2022 година, а зголемување на цените е забележано кај палминото, сојното, сончогледовото масло, но и кај маслото од репка.
Цените на месото се зголемија за еден процент на 127,7 поени, првенствено поради значителното зголемување на цените на свинското месо во Европската Унија поради сезонската побарувачка, а цените на говедското месо исто така се зголемија, особено од Бразил, додека цените на живината и овчо месо се намалија.
Вредноста на индексот на млечни производи се зголеми за 1,2 проценти на 120,9 поени, што е прво зголемување од јули 2025 година.
Зголемување на цените е забележано кај млекото во прав и путерот, додека цените на сирењето продолжија да паѓаат, особено во Европа, поради поголемото производство и послабата побарувачка за извоз.
Најголем скок е забележан кај шеќерот, чии цени се зголемија за 7,2 проценти на 92,4 поени и достигнаа највисоко ниво од ноември 2025 година.
Зголемувањето е резултат на повисоките цени на нафтата и очекувањата дека Бразил ќе насочи повеќе шеќерна трска кон производство на етанол.
Вредноста на FFPI е повисока за еден процент во споредба со март 2025 година, но пониска за 19,8 проценти во споредба со рекордните вредности забележани во март 2022 година, се додава во извештајот на веб-страницата на ФАО.
© Vecer.mk, правата за текстот се на редакцијата
