Акциите на „Алфабет“, матичната компанија на „Гугл“, вчера го забележаа најголемиот еднодневен пад во историјата на компанијата. Нивната вредност падна за речиси 13 проценти, бришејќи околу 500 милијарди долари од пазарната вредност на „Алфабет“. Продажбата беше предизвикана од разочарувачките деловни резултати, забавувањето на растот на приходите од интернет-пребарување и растечката загриженост на инвеститорите за огромните трошоци за развој на вештачка интелигенција, објавува „Волстрит џурнал“.
Акциите на „Алфабет“ затворија на 283,82 долари, што е намалување од 12,64 проценти. Тоа беше втора најголема еднодневна загуба на пазарна вредност за компанија во историјата на американскиот берзански пазар. Само „Нвидија“ забележа поголема загуба во јануари 2025 година, кога изгуби околу 593 милијарди долари од вредноста.
Падот на матичната компанија на „Гугл“ ги повлече надолу и американските берзански индекси, особено технолошкиот Насдак.
Најважниот бизнис на „Гугл“ почнува да забавува
Инвеститорите беа особено загрижени за резултатите од рекламниот бизнис на „Гугл“, кој со децении беше главен извор на приходи и профит за компанијата.
Приходите од интернет-пребарување на „Гугл“ се зголемија за 12 проценти во третиот квартал во споредба со претходната година. Иако сè уште бележеа раст, беа многу побавни отколку на почетокот на годината. Приходите од пребарување пораснаа за 19 проценти во првиот квартал и за 17 проценти во вториот.
Одделот за услуги на „Гугл“, кој вклучува интернет-пребарување, „Јутјуб“ и претплати, генерираше приходи од 96,3 милијарди долари, што е под очекувањата на аналитичарите од 98,5 милијарди долари.
Вкупните приходи на „Алфабет“ изнесуваа 127,6 милијарди долари, што е зголемување од 25 проценти во споредба со претходната година, но сепак не ги исполни очекувањата на Волстрит. Нето-добивката се намали за 25 проценти, на 26,17 милијарди долари.
Послабите резултати покренаа прашања за тоа дали „Гугл“ може да продолжи да ги генерира претходните високи приходи од рекламирање, бидејќи вештачката интелигенција го менува начинот на кој луѓето го користат интернетот.
Вештачката интелигенција го загрозува деловниот модел на „Гугл“
„Гугл“ се соочува со проблем кој делумно е создаден од сопствениот развој на вештачката интелигенција.
Неговото традиционално веб-пребарување функционира така што им прикажува на корисниците врски до веб-страници, вклучувајќи и платени реклами. Огласувачите плаќаат кога корисниците кликнуваат на нивните реклами.
Но, сè повеќе корисници добиваат информации директно од одговори генерирани од вештачка интелигенција, без да мора да посетуваат други страници.
Затоа „Гугл“ започна да воведува пребарување со АИ-режим (AI Mode), кој им нуди на корисниците одговори генерирани од вештачка интелигенција наместо редовна листа на резултати.
Проблемот е што компанијата моментално заработува помалку пари од ваквите пребарувања отколку од традиционалното пребарување.
Филип Шиндлер, главен деловен директор на „Гугл“, потврди за време на разговорот со аналитичарите дека барањата во АИ-режимот моментално генерираат помалку приходи од реклами од редовните пребарувања.
Ова значи дека „Гугл“ може да забележи раст во користењето на своите услуги, додека истовремено се соочува со притисок врз приходите од рекламирање.
„Гугл“ троши огромни суми на вештачка интелигенција
Во исто време, додека нејзината основна дејност забавува, „Алфабет“ инвестира огромни суми во центри за податоци, компјутерски чипови и развој на нови модели на вештачка интелигенција.
Компанијата пријави негативен слободен паричен тек од 9,07 милијарди долари во третиот квартал. Тоа значит дека нејзиното трошење во готово за инвестиции ги надмина парите што ги генерираше од оперативните активности во текот на тој период. Аналитичарите очекуваа слободниот паричен тек да биде блиску до нула.
Во претходниот квартал, негативниот слободен паричен тек изнесуваше 5,9 милијарди долари, што покажува колку брзо се зголемуваат потребите за готовина на компанијата.
Финансиската директорка на „Алфабет“, Анат Ашкенази, предупреди дека капиталните трошоци значително ќе се зголемат во 2027 година. Поголемиот дел од дополнителните трошоци се поврзани со инфраструктурата потребна за вештачка интелигенција.
Ваквите трошоци беа прифатливи за инвеститорите во последниве години, бидејќи тие очекуваа силниот бизнис за пребарување на „Гугл“ да продолжи да го финансира развојот на нови технологии. Но, најновите резултати покренаа прашања за тоа колку долго може да функционира тој модел.
Конкуренцијата расте
Дополнителен притисок врз „Гугл“ доаѓа од компаниите „ОпенАИ“ и „Антропик“, чии системи за вештачка интелигенција сè повеќе преземаат дел од задачите за кои корисниците порано користеа интернет-пребарувачи.
„ОпенАИ“ започна со тестирање на реклами на „ЧетГПТ“ на почетокот на годината, а во текот на летото објави дека е на добар пат да достигне 1 милијарда долари годишен приход од рекламирање.
Според „Волстрит џурнал“, повеќе од 100.000 огласувачи веќе воделе кампањи на „ЧетГПТ“, а рекламите се достапни во 89 земји.
Сепак, експертите за дигитално рекламирање предупредуваат дека сè уште не гледаме масовна прераспределба на буџетите за рекламирање од „Гугл“ кон „ОпенАИ“. Многу компании само го тестираат новиот рекламен канал, користејќи дополнителни средства или помали делови од нивните постоечки буџети.
Растот на конкуренцијата предизвикува загриженост кај инвеститорите бидејќи „Гугл“ повеќе ја нема несомнената доминантна позиција во начинот на кој корисниците наоѓаат информации на интернет.
Аналитичари: „Гугл“ мора да докаже дека инвестициите се исплатуваат
Мајк О’Рурк, главен пазарен стратег во „Џонс трејдинг“, рече дека резултатите на „Алфабет“ ја покажаа ранливоста на неговиот бизнис-модел.
Според него, особено е загрижувачки што компанијата која е меѓу најголемите инвеститори во вештачка интелигенција за заштита на сопствениот бизнис, истовремено покажа колку е тој бизнис изложен на промените што ги носи новата технологија.
Аналитичарите на „Џеј-Пи Морган“ исто така предупредија дека најновите резултати покажуваат колку малку простор за грешка имаат технолошките компании што инвестираат стотици милијарди долари во инфраструктура за вештачка интелигенција.
„Њу стрит рисерч“ проценува дека загриженоста на инвеститорите ќе трае сè додека „Алфабет“ не покаже поубедливи резултати во пребарувањето на интернет и поголема способност за генерирање приходи од вештачка интелигенција. Тие проценуваат дека ова би можело да потрае до првата половина на 2027 година.
Иако „Гугл клауд“ постигна силен раст на приходите, тоа не успеа целосно да ги увери инвеститорите.
Историскиот пад на акциите на „Алфабет“ стана едно од најочигледните предупредувања дека Волстрит почнува построго да ја проценува профитабилноста на огромните инвестиции во вештачка интелигенција.
© Vecer.mk, правата за текстот се на редакцијата
