Државниот пазарен инспекторат (ДПИ) при последните контроли откри дека одредени маркети во земјава ги зголемиле своите бруто маржи за 2 до 5 проценти во споредба со истиот период минатата година. Ова денеска го соопшти премиерот Христијан Мицкоски, кој најави итна реакција на Владата и порача дека трговците кои профитираат на грбот на граѓаните ќе бидат повикани на состанок за да им се упати последно и јасно предупредување.
Премиерот даде и конкретен пример за оваа појава, посочувајќи дека во маркетите каде што минатата година во јуни бруто маржата изнесувала 10 проценти, сега таа е крената на 12 или 15 проценти. Мицкоски беше дециден дека ваквото однесување е недозволиво и дека државата нема намера да го толерира ова дополнително оптоварување на семејните буџети.
„Во одредени маркети нотирано е зголемување на бруто маржата споредена со минатата година од 2 до 5%. Тие ќе бидат повикани на состанок и јасно ќе им се каже дека тоа е недозволиво. Да бидам конкретен со пример: ако минатата година во месец јуни бруто маржата била 10%, сега е 12 или 15%. Тоа се тие дополнителни 2 до 5%. Тоа ние нема да го толерираме и многу јасна порака ќе испратиме кон тие. Кога би се намалиле тие 2 до 5%, тогаш практично ние би биле земја со најниска инфлација во Европа во овој момент, иако очекувам стабилизирање на инфлацијата во јуни месец, многу помала вредност во споредба со мај и со април. Но, ајде да почекаме, за една недела треба да се објават тие параметри, врз основа на бројките коишто ги добивам од Државниот пазарен инспекторат“, изјави Мицкоски.
© Vecer.mk, правата за текстот се на редакцијата
