Apple издаде итно безбедносно предупредување за корисниците на iPhone ширум светот - милијарди мобилни телефони се потенцијално изложени на ризик поради сериозни безбедносни недостатоци на софтверот.
Според компанијата, ранливостите се однесуваат на WebKit - механизмот што го користи Safari и бројни други апликации за прикажување на интернет содржина. Овие ранливости веќе активно се користат во хакерски напади, што може да доведе до кражба на податоци или контрола на уреди.
Apple ги објави најновите безбедносни закрпи како дел од ажурирањето на iOS 26.2, но проблемот е што многу корисници сè уште не ја инсталирале најновата верзија на оперативниот систем.
Според достапните податоци, само мал процент од корисниците се префрлиле на iOS 26, додека поголемиот дел од iPhone-ите сè уште работат на постари, помалку безбедни верзии на софтверот, оставајќи ги изложени на потенцијални напади.
Како да препознаете дали вашиот iPhone е компромитиран?
Експертите за сајбер безбедност предупредуваат на неколку знаци што можат да укажуваат на компромитиран уред:
- чести и неочекувани реклами и скокачки прозорци
- апликации што корисникот не ги инсталирал самиот
- забрзано празнење на батеријата
- забележително забавено работење на телефонот
- невообичаено голема потрошувачка на мобилен интернет
Како да се заштитите
Во случај корисниците да забележат некој од овие симптоми, се препорачува веднаш да го ажурирате уредот, да ги промените лозинките за важните сметки и да ги отстраните сомнителните апликации.
Apple вели дека редовните ажурирања на софтверот се еден од најефикасните начини за заштита од сајбер закани и ги поттикнува корисниците да не го одложуваат инсталирањето на најновите безбедносни закрпи.
© Vecer.mk, правата за текстот се на редакцијата
