Кога се зборува за милијардери, најчесто првата асоцијација се технологијата, инвестициите и компаниите чија вредност се мери во стотици милијарди долари. И не е случајно – финансискиот сектор и технологијата навистина создадоа огромен број од најбогатите луѓе во светот.
Сепак, листата на најбогати Американци за 2026 година покажува дека патот до милијарди не води само преку софтвер, вештачка интелигенција или берзи. Големи богатства се создадени и во прехранбената индустрија, недвижностите, автомобилскиот сектор, логистиката, производството на средства за чистење, па дури и во бизниси како изнајмување авиони и контрола на штетници.
Според листата „Форбс 400“, најголем дел од најбогатите Американци доаѓаат од 16 индустрии. Проценките се направени врз основа на вредноста на акциите и другите средства, земајќи ги предвид долговите и одредени донации, а податоците се однесуваат на почетокот на септември 2026 година.
Финансиите и технологијата создаваат најмногу милијардери
На врвот се финансискиот сектор и инвестициите, од каде што доаѓаат 108 членови на листата „Форбс 400“. Во оваа категорија се основачи на хеџ-фондови, инвестициски компании, фондови за ризичен капитал, хипотекарни компании и наследници на големи финансиски империи.
Најбогат претставник од оваа индустрија е Ворен Бафет, чие богатство се проценува на 144 милијарди долари.
Веднаш зад финансиите е технологијата со 91 претставник. Иако бројот е помал, токму технолошкиот сектор создава дел од најголемите индивидуални богатства. Елон Маск, со проценето богатство од 908 милијарди долари, е најбогатиот претставник од оваа категорија.
Новата фаза на технолошкото богатство е поврзана со вештачката интелигенција, која веќе донесе нови имиња меѓу најбогатите, меѓу кои и коосновачот и претседател на OpenAI, Грег Брокман.
Богатства се создаваат и во храна, мода и недвижности
По финансиите и технологијата, значаен број милијардери доаѓаат од традиционални индустрии.
Прехранбената индустрија и производството на пијалаци имаат 35 претставници на листата. Модата и малопродажбата се застапени со 26, енергетиката со 23, недвижностите со 18, а медиумите и забавата со 17 милијардери.
Спортот има 16 претставници, здравството и производството по 15, услужните индустрии 11, автомобилската индустрија осум, а логистиката четири.
На дното на листата се градежништвото и инженерството со тројца претставници, како и индустријата за коцкање и казина со двајца.
Милијарди се заработуваат и од „невидливи“ бизниси
Дел од најинтересните приказни доаѓаат од индустриите кои не се секогаш во центарот на вниманието.
Во услужниот сектор се наоѓаат милијардери чие богатство е создадено преку изнајмување авиони, крстосувачки бродови и магацински простор.
Гари Ролинс е поврзан со компанијата „Ролинс“, основана од неговиот татко, која се занимава со контрола на штетници како препарати против стаорци, оси, муви, термити... и слично.
Во производството, дел од големите богатства се поврзани со наследниците на компанијата „СЦ Џонсон“, позната по производите за чистење „Виндекс“ и „Глејд“.
Автомобилската индустрија покажува дека милијарди не се создаваат само со производство на возила. Големи богатства се направени и преку продажба, сервисирање, дистрибуција и производство на делови.
Истото важи и за логистиката – бизниси кои често остануваат невидливи за потрошувачите, но се клучни за функционирањето на целиот трговски синџир.
Основачите и семејствата најчесто го контролираат богатството
Една заедничка карактеристика на најголемите богатства е сопственоста. Во најголем број случаи, милијардерите се луѓе кои ги основале компаниите или се наследници на семејства кои со генерации ги контролираат бизнисите.
Во прехранбената индустрија, Жаклин и Џон Марс се меѓу најбогатите благодарение на компанијата „Марс“.
Во малопродажбата доминира семејството Волтон, чиј капитал е поврзан со „Волмарт“.
Во енергетиката голем дел од богатствата се создадени преку нафтени компании, додека во здравството се појавуваат сопственици и наследници на фармацевтски компании, производители на медицинска опрема и болнички системи.
Главната порака од листата „Форбс 400“ е дека платата, дури и кога е исклучително висока, ретко создава богатство од вакви размери. Најголемите богатства најчесто произлегуваат од сопственоста над компании кои можат да растат со децении.
Европа има поинаков рецепт за богатство
Европската слика е различна од американската. Додека во САД доминираат технологијата и финансиите, во Европа големите богатства често се поврзани со луксузни брендови, мода, малопродажба, храна и семејни компании.
Шпанецот Амансио Ортега го изгради модниот гигант Inditex, сопственик на брендот Zara.
Французинот Бернар Арно своето богатство го поврза со LVMH, империја која обединува десетици луксузни брендови предводена од брендот Луј Витон.
Во Германија, едно од најголемите богатства е создадено преку малопродажниот гигант Lidl и Schwarz Group, зад кој стои Дитер Шварц.
Италијанскиот милијардер Џовани Фереро е дел од третата генерација на семејството зад компанијата Ferrero, позната по брендовите Nutella, Kinder и Tic Tac.
Заедничкиот именител и во Европа и во САД не е само индустријата, туку сопственоста – ретко сњ станува милијардер на кус рок од, на пример десетиан години, компаниите што можат да растат со генерации и да создаваат капитал низ децении.
© Vecer.mk, правата за текстот се на редакцијата
