Западнонилската треска повторно се шири низ Европа, а најблиску до нас е регистрирана во Грција, каде бројот на заразени достигна 21 лице. Дел од пациентите имале посериозни симптоми, а случаи на вирусот се пријавени во македонија и други европски земји, објави „Гр тајмс“.
Грчката национална организација за јавно здравје (ЕОДИ) соопшти дека 20 од заразените пациенти во земјата развиле тешки симптоми , меѓу кои енцефалитис, менингитис или парализа.
Во изминатата недела биле регистрирани 14 нови случаи, а 13 пациенти се на болничко лекување. Досега нема пријавени смртни случаи.
Најмногу случаи се регистрирани во областа Атика, меѓу другото во Спата-Артемида, Маркопуло, Вари, Коропи, Лаврио, Неа Јонија, Атина и во Глифада.
Поединечни случаи се пријавени и во Лариса и во Палама.
Западнонилската треска е вирусно заболување кое се пренесува преку убод од инфициран комарец. Најголем дел од инфицираните немаат симптоми или имаат лесна клиничка слика, додека кај мал број пациенти, особено кај повозрасни луѓе и луѓе со ослабен имунитет, може да се развијат потешки невролошки компликации.
Вирусот се смета за ендемски во Грција од 2010 година, а неговото повторно појавување се очекува во летните месеци. Слична епидемиолошка состојба е забележана и во Италија, Македонија, Романија и во Шпанија.
ЕОДИ апелира до надлежните институции да продолжат со внимателно следење на состојбата и со систематска контрола на комарците, а граѓаните строго да ги почитуваат мерките за лична заштита.
© Vecer.mk, правата за текстот се на редакцијата
