Американскиот претседател Доналд Трамп остро му возврати на поранешниот претседател Барак Обама, откако тој јавно го исмеваше за преуредувањето на Белата куќа и ја критикуваше неговата политика за време на предизборни собири во Охајо и Мичиген.
Во објава на својата социјална мрежа „Трут соушал“, Трамп го нарече Обама „ужасно неспособен претседател“, обвинувајќи го дека му исплатил милијарди долари на Иран и му овозможил пат кон развој на нуклеарно оружје.
Трамп се осврна и на претходните претседателски избори, потсетувајќи дека Обама активно ги поддржувал Хилари Клинтон и Камала Харис, кои ги загубија изборните трки.
„Тврдеше дека корумпираната Хилари Клинтон ќе победи, жестоко водеше кампања за неа, а таа загуби. Потоа со сите сили водеше кампања за Камала, а и таа загуби“, напиша Трамп.
Најголемиот дел од објавата го посвети на демократскиот кандидат за Сенатот од Мичиген, Абдул Ел Сајед, кого Обама го поддржува во изборната трка против републиканецот Мајк Роџерс.
Трамп го нарече Ел Сајед „џихадист на Муслиманското братство“, обвинувајќи го дека ги мрази Евреите, Афроамериканците и Американците. Го нарече и „лажен лекар“, тврдејќи дека раководи со „најлошата клиника во Америка“.
За овие обвинувања не понуди докази. Според агенцијата АП, тврдењето дека Ел Сајед е „џихадист“ е невистинито, а Трамп и неговите републикански сојузници се обидуваат да го поврзат кандидатот со Муслиманското братство.
„Мичиген не сака арогантен џихадист кој се залага за отворени граници, лажен лекар чиј углед само ќе се влошува како што ќе излегуваат нови информации. А ги има многу. Гласајте за Мајк Роџерс! Тој никогаш нема да ве изневери!“, порача Трамп.
Неговата реакција следуваше по настапите на Обама во кампањата за конгресните избори закажани за 3 ноември. Поранешниот претседател ги критикуваше политиките на Трамп кон Иран, царините, имиграцијата и промените во ентериерот на Белата куќа.
Особено внимание привлече шегата на Обама за златните украси што Трамп ги поставил во претседателската резиденција.
„Не знам дали забележавте, но изгледа дека е многу сосредоточен на реновирање на домот. Требаше да биде на телевизијата HGTV“, рече Обама.
Потоа додаде: „Белата куќа изгледа како Садам Хусеин да отворил ресторан ‘Чизкејк фактори’. Злато има насекаде“.
За време на настапот во Детроит, Обама застана во одбрана на Ел Сајед, осудувајќи ги нападите поврзани со неговата муслиманска вероисповед. Потсети дека и самиот бил цел на невистинити тврдења за своето потекло и религија во претходните претседателски кампањи.
„Абдул е човек од Мичиген колку што некој воопшто може да биде“, изјави Обама, посочувајќи дека кандидатот пораснал во таа сојузна држава и дека неговото семејство има врски со автомобилската индустрија.
Изборната трка за сенаторското место во Мичиген е меѓу поважните натпревари на претстојните конгресни избори во САД, кои ќе влијаат врз распределбата на политичката моќ во Конгресот.
© Vecer.mk, правата за текстот се на редакцијата
