Украинскиот претседател Володимир Зеленски одбил предлог за користење автономни дронови со вештачка интелигенција во напади врз московските аеродроми, објави „Атлантик“. Според наводите на американското списание, предлогот дошол од американски советници, а технологијата требало да им овозможи на дроновите да ги избегнуваат руските системи за електронско попречување и да го нарушат воздушниот сообраќај во руската престолнина.
Иако планот предвидувал употреба на напредна АИ-технологија за изведување на нападите, Киев се откажал од идејата поради проценката дека последиците би можеле да бидат непредвидливи. Стравот од неконтролирана ескалација на војната бил главната причина поради која предлогот бил одбиен, наведува „Атлантик“.
Според пишувањето на „Атлантик“, предлогот вклучувал напредна технологија со која леталата самостојно ги идентификуваат метите без потреба од континуирана GPS врска или оператор на земја. Со ова требало да се неутрализираат руските системи за електронско потиснување, кои досега соборија голем број украински беспилотни летала. Идејата била да се предизвика хаос во цивилниот и воениот воздушен сообраќај околу руската престолнина.
И покрај воениот потенцијал на таквиот систем, Володимир Зеленски пресекол дека ризикот е преголем. Главната загриженост на Киев се однесувала на можноста за непредвидени грешки на вештачката интелигенција кои би можеле да доведат до цивилни жртви на московските аеродроми. Дополнително, украинските власти оценија дека ваквиот потег може сериозно да ги наруши односите со западните сојузници и да и даде на Москва повод за уште пожесток одговор врз украинската цивилна инфраструктура.
Случајот ги истакнува границите на примената на автономните оружја во современите конфликти. Иако западните технолошки компании сè почесто тестираат системи засновани на вештачка интелигенција во Украина, одлуката на Зеленски покажува дека политичките одлуки сè уште ги надминуваат технолошките можности кога во прашање е безбедноста на регионот.
© Vecer.mk, правата за текстот се на редакцијата
