Спасувачите во Кривји Рих и натаму се борат со последиците од еден од најтешките напади врз градот во последниот период. Во разорниот руски напад со беспилотни летала врз трговски центар загинаа 16 лица, повеќе од 130 се повредени, меѓу нив и деца, а девет лица сè уште се водат како исчезнати. Спасувачките екипи продолжуваат да ги пребаруваат урнатините, додека украинскиот претседател Володимир Зеленски, чиј роден град е Кривји Рих, нападот го осуди како намерен и брутален. Според украинските власти, на местото бил извршен и втор удар околу половина час по првиот, кога веќе пристигнале спасувачките екипи.
Нападот бил извршен во два брана, во тактика позната како „двоен допир“, при што вториот удар, според украинските власти, бил насочен кон спасувачките екипи кои веќе биле на местото на нападот.
Украинскиот претседател Володимир Зеленски нападот го опиша како „циничен и неуспешен“ и обвини дека вториот удар бил извршен со цел да се погодат спасувачите. Руската армија досега не го коментирала нападот во Кривји Рих, родниот град на Зеленски. Од руското Министерство за одбрана, пак, соопштија дека руските сили во последните напади гаѓале транспортна инфраструктура и магацини.
Меѓу повредените има 23 деца
Шефот на регионалната воена администрација Олександр Ханжа потврди дека меѓу повредените во регионот Дњепропетровск има 23 деца.
Бројот на загинати се зголемил на 16 откако спасувачите во текот на ноќта извлекле уште едно тело од урнатините. Според властите, 29 повредени се во тешка состојба, поради што постои опасност бројот на жртви дополнително да се зголеми.
Спасувачки екипи од уште четири украински региони биле испратени во Кривји Рих за да помогнат во потрагата по преживеани. Додека спасувачите ја продолжуваат потрагата во Кривји Рих, украинските власти известуваат за нови руски напади низ земјата.
Во Киев едно лице загинало во пожар во магацин по тревога за балистичка ракета. Во Запорожје, најмалку едно лице е убиено, а четири се повредени во напад со руски дрон. Во одделни напади во Николаевската област вчера загинале четири лица, меѓу кои три деца. Уште две лица биле убиени во регионот Харков.
Само еден ден претходно, во голем руски ракетен и беспилотен напад врз Киев загинаа 17 лица, а повеќе од 40 беа повредени.
Во меѓувреме, украинската војска продолжува со напади врз цели на руска територија. Киев во последните месеци ги засили нападите врз руските енергетски капацитети и други објекти за кои тврди дека се поврзани со финансирањето и водењето на руската војна.
Русија ја започна целосната инвазија врз Украина во февруари 2022 година и во моментов контролира околу една петтина од украинската територија, главно на југоистокот.
© Vecer.mk, правата за текстот се на редакцијата
