Црногорската полиција уапсила маж и жена, странски државјани, откако во нивниот багаж била пронајдена обемна опрема наменета за следење и надзор, пренесуваат црногогрските медиуми.
Според информациите, се работи за државјани на Русија и на Израел – Александар Михаиловиќ Кругљански (31) и Александра Кругљанска (42), кои биле уапсени на аеродромот додека се обидувале да се качат на лет за Тел Авив, носејќи дури 19 куфери и торби.
За време на детална проверка од граничната полиција, во повеќе од половина од багажот била откриена софистицирана опрема, за која властите се сомневаат дека се користи за надзор, шпионажа и откривање на уреди за прислушување.
Меѓу конфискуваните предмети се Џи-пи-ес тракер со интегриран микрофон, професионален детектор за радио сигнали (BugHunter Professional BH-04), наменет за пронаоѓање скриени безжични микрофони и камери, камери за надзор и сродна опрема за видеонадзор, компјутерски компоненти, мемориски уреди и кабли.
Покрај споменатата ИТ-опрема, полицијата од осомничените конфискува и непријавени лекови и 26.210 евра и 1.150 израелски шекели (330 евра).
Според порталот „Вијести“, осомничените престојувале во Црна Гора врз основа на туристичка виза и во изминатиот период неколку пати влегувале во земјата.
По наредба на државниот обвинител во Основното државно обвинителство во Котор, против нив е поднесена кривична пријава поради сомнение за сторени кривични дела шверц и перење пари.
Полициската управа на Црна Гора објави дека во рамките на оваа истрага се преземаат интензивни активности во соработка со Агенцијата за национална безбедност (АНБ) и меѓународните разузнавачки партнери, со цел целосно да се расветлат мотивите и позадината на дејствијата на уапсените.
© Vecer.mk, правата за текстот се на редакцијата
