Најмалку 47 лица се убиени во крвав ноќен напад на вооружени банди врз населба во ридовите над главниот град на Хаити, Порт-о-Пренс. Според градоначалникот Жан Масилон, нападот повторно го стави во фокус алармантното ниво на насилство во земјата, каде што населението со месеци е изложено на напади од вооружени групи.
Нападот во населбата Кенскоф започнал околу 22:30 часот по локално време. Според хаитската организација за човекови права RNDDH, загинале повеќе од 40 лица, а над 20 се повредени, при што се стравува дека конечниот број на жртви може да биде и поголем.
Кенскоф, кој се наоѓа на падините над важни сообраќајни правци кон главниот град, од минатата година беше цел на десетина напади. Илјадници жители биле принудени да ги напуштат своите домови, а во насилствата имало убиства, киднапирања, силувања, подметнување пожари и кражби на добиток.
Жителите сега бараат оставка од локалниот полициски началник, обвинувајќи ги безбедносните сили дека не успеале да ги заштитат луѓето, иако дел од жртвите биле убиени на само неколку минути од полициската станица.
Хаитската влада го осуди нападот и вети дека ќе ја зајакне безбедноста. Од кабинетот на премиерот порачаа дека Кенскоф „нема да биде напуштен“ и дека државата повторно ќе ја воспостави контролата.
Според Обединетите нации, само во нападите во Кенскоф во првите месеци од 2025 година биле убиени повеќе од 260 лица, уништени или запалени околу 200 куќи, а околу 3.000 жители биле раселени.
Новото насилство дополнително ја зголемува загриженоста за можноста Хаити во декември да одржи избори, кои би биле први во последните десет години. Изборите повеќепати беа одложувани додека вооружените банди го прошируваат своето влијание.
© Vecer.mk, правата за текстот се на редакцијата
