Милена Богојевска (51) ќе помине најмалку шест години зад решетки во Австралија, откако судот ја осуди на вкупно осум години затвор за убиство од небрежност на нејзината 85-годишна соседка Лолин Вајтхенд. Македонката се изјаснила за виновна за делото, а условен отпуст ќе може да побара дури по истекот на шестгодишниот период.
Случајот се случил во јули 2024 година во Мелбурн. Богојевска ја задушила старицата, а потоа го сокрила телото во кеса и го фрлила во реката Марибирнонг. Телото било пронајдено два дена подоцна од рибар.
По смртта на соседката, Богојевска од нејзиниот дом украла пари, накит, банкарски картички и лични документи. Со украдените средства купувала лотариски тикети, ваучери, чевли и iPad-и во вредност од речиси 4.000 австралиски долари.
Судијката Џасинта Форбс нејзиното однесување го опишала како „опортунистичко, пресметано и себично“. Обвинителството првично ја теретело за убиство, но подоцна било прифатено изјаснувањето за убиство од небрежност.
© Vecer.mk, правата за текстот се на редакцијата
