Седумгодишно момче било оставено само неколку часа на планината Фуџи во Јапонија, откако неговиот 48-годишен татко му рекол да „почека тука“ бидејќи било уморно, а потоа продолжил кон врвот со својот постар син. Детето било оставено на планината во услови на магла и дожд, на надморска височина од повеќе од 2.000 метри.
Момчето било пронајдено околу 7:30 часот наутро во четвртокот, како седи само на клупа во близина на шестата станица на планинарската рута. Според информациите, таткото му оставил сок и ужина пред да продолжи со искачувањето, но детето останало само неколку часа на Фуџи.
Случајот бил пријавен до надлежните, а седумгодишникот бил пронајден безбедно, иако во моментот на пронаоѓањето времето било неповолно, со дожд и густа магла.
Според локалните медиуми, таткото на детето му оставил само безалкохолен пијалак и ужина, а потоа продолжил нагоре. Вработени во планинарскиот дом го забележале момчето и ја известиле полицијата. Полицајците подоцна го пронашле таткото на осмата станица, која од местото каде што било детето била оддалечена околу три часа пешачење.
Полицијата го опоменала таткото
Откако таткото се вратил и повторно се сретнал со синот, полицијата го опоменала поради неговата постапка.
„Дури и ако тоа значи да се откажеме од заедничкото искачување на планината, оставањето дете зад себе е неприфатливо“, му рекол полицаецот, пренесуваат јапонските медиуми.
Таткото наводно се извинил и признал дека донел „брза“ одлука.
Семејството се движело по рутата Фуџиномија, која започнува од петтата станица на Фуџи. Од таму до врвот се потребни околу пет часа пешачење, а за спуштање уште околу три часа.
Фуџи е висок 3.776 метри
Планината Фуџи е висока 3.776 метри и е една од трите традиционални „свети планини“ во Јапонија. Во 2013 година беше прогласена за светско наследство.
Секоја година околу 200.000 луѓе ја посетуваат планината и се искачуваат по нејзините рути, но во последните години се регистрирани повеќе несреќи и случаи во кои планинари морале да бидат спасувани.
Во јули, 99-годишна жена била спасена откако паднала при искачување и ги повредила колкот и грбот. Минатата година, 27-годишен студент загинал откако двапати во само четири дена морал да биде спасуван на планината. Вторпат се вратил на Фуџи за да го пронајде изгубениот мобилен телефон.
© Vecer.mk, правата за текстот се на редакцијата
