Григориј Нехорошев, шеесет и деветгодишен руски новинар и поранешен главен уредник на згаснатиот весник „Москва кореспондент“, почина во петокот во Рига, главниот град на Латвија, откако конзумирал отровни печурки што ги собрал во дворот на својата куќа, јавуваат британските медиуми.
Латвиските власти сè уште не ја коментирале неговата смрт, но е најавена обдукција.
Нехорошев беше познат како личен непријател на рускиот претседател Владимир Путин бидејќи во април 2008 година беше првиот што јавно ја откри наводната тајна врска на претседателот со ритмичката гимнастичарка и олимписка шампионка Алина Кабаева, триесет години помлада од него.
Во таа статија беше објавено дека Путин планира да се разведе од тогашната сопруга Људмила и да се ожени со Кабаева. Веста потоа беше демантирана од двајцата, а Путин рече дека се спротивставува на оние што се мешаат во животите на другите луѓе со своите „лигави носеви“ и „еротски фантазии“.
Бегство по заканите од тајните служби
По објавувањето на сторијата во 2008 година, сопственикот на весникот, Александар Лебедев, поранешен шпион на КГБ кој станал банкар и претприемач, бил принуден да го затвори „Московски кореспондент“. Тајните служби го испрашувале Нехорошев и му се заканувале, поради што морал да избега во странство. После тоа, тој накратко се вратил во својата татковина, а последните 11 години живеел во егзил во Латвија како политички бегалец.
Иако рускиот претседател никогаш јавно не ја признал врската со Кабаева, неколкугодишните истражувања на независните медиуми, како што се швајцарскиот весник „Зонтагс Цајтунг“ и истражувачкиот центар „Дозиер“, ја потврдија точноста на таа информација. Според тие извори, двојката има две деца, единаесетгодишниот Иван и седумгодишниот Владимир помладиот, кои живеат под строга безбедност.
Овие тврдења се поткрепени со официјалните санкции на Соединетите Американски Држави, Обединетото Кралство и Европската Унија, кои ја вклучија Кабаева на списоците на санкционирани лица токму поради нејзината блиска лична врска со Путин.
Според порталот Делфи и изјавите на пријателите, Нехорошев починал дома откако конзумирал печурки што ги собрал во дворот. Иако бил обожавател и познавач на печурки, се покажало дека станува збор за отровен вид.
„Путин никогаш не му прости“
Руската новинарка Божена Ринска, која исто така живее во Латвија, го нарече неговото заминување несфатливо.
Неговиот пријател Игорс Ватољинс, кој го видел непосредно пред неговата смрт, рекол дека уредникот бил релативно млад и здрав човек, полн со идеи и планови. Ватољинс додаде дека Путин очигледно никогаш не му простил што ја открил својата врска со Кабаева, а пријателите истакнуваат дека во текот на сите години што ги поминал во Рига, Нехорошев бил доста нервозен поради страв од можен напад од страна на атентаторите на Путин.
Иако во моментов нема цврсти докази дека станува збор за насилна смрт, британските медиуми нè потсетуваат дека неколку непријатели на Путин починале под сомнителни околности.
Истражувачката новинарка Ана Политковскаја беше убиена во нејзината станбена зграда во Москва во 2006 година, а поранешниот агент на ФСБ Александар Литвиненко беше отруен истата година во Лондон со радиоактивен полониум-210.
Олигархот Борис Березовски беше пронајден обесен во Обединетото Кралство во 2013 година, додека опозицискиот политичар Борис Немцов беше застрелан во близина на Кремљ во 2015 година.
Водачот на приватната армија на Вагнер, Евгениј Пригожин, загина во авионска несреќа во 2023 година, а следната година, лидерот на опозицијата Алексеј Навални почина во затвор во рускиот Арктик.
Минатата недела, четириесет и четиригодишниот уметник Семјон Скрепецки, познат по прикажувањето на Кремљ во своите дела, беше убиен во Полска.
© Vecer.mk, правата за текстот се на редакцијата
