Од 6 ноември, Велика Британија ќе воведе забрана за три вида екстремна порнографија — содржина што прикажува задушување или давење, сексуални односи меѓу членови на семејството и возрасни кои се претставуваат како деца под 16 години. Одредени инсценирани прикази се исто така забранети, а казните за нивно објавување можат да достигнат и до пет години затвор, пишува „Скај њуз“.
Новите мерки се дел од напорите на британската влада за намалување на насилството врз жените и девојчињата. Тие беа воведени по притисокот од претставници на различни партии кои предупредуваат на штетните последици од ваквата содржина. Забраната го опфаќа и поседувањето и објавувањето на овие материјали, при што поседувањето е казниво со затвор до две години.
Што точно е забрането?
Новите правила се однесуваат на порнографски снимки и слики што експлицитно и реално го прикажуваат задушувањето или давењето на друго лице, пенетративните сексуални односи меѓу членови на семејството (или лица кои се преправаат дека се во роднинска врска) и сексуалните активности во кои барем едно лице се претставува како дете под 16 години.
Забраната опфаќа и инсценирана содржина, дури и кога лицата што учествуваат во снимањето не се во роднинска врска или се полнолетни.
Британската влада нагласува дека регулативите се однесуваат на реалистични прикази. Во случај на содржини што прикажуваат задушување или давење, забраната опфаќа и реалистични слики создадени со вештачка интелигенција.
Министерката: „Не ги криминализираме безопасните сексуални склоности“
Британската министерка за правда Алекс Дејвис-Џонс изјави дека владата е решена да го преполови насилството врз жените и девојчињата во следните десет години, но посочи дека штетната порнографска содржина е сè уште лесно достапна за многу луѓе на интернет.
„Не станува збор за криминализирање на безопасните сексуални склоности. Но, порнографијата може да ги обликува сфаќањата на луѓето за тоа како изгледа здрава врска, особено кај младите“, рече таа.
„Содржината што го нормализира или дури го величи насилството врз жените е опасна и може да ја замагли границата меѓу она што е прифатливо и она што не е во реалниот живот“, додаде таа.
„Екстремната и насилна содржина не е прифатлива“
Конзервативната членка на Домот на лордовите, Габи Бертин, која спроведе независна ревизија на регулативата за порнографија во 2025 година, ги поздрави новите мерки и изјави дека тие не можеле да дојдат подобро и побрзо.
Нејзината анализа предупреди на сериозните последици од порнографските прикази на задушување жени, но и на вознемирувачката содржина што вклучува глумење инцест и возрасни кои се претставуваат како деца.
„Оваа измена на законот, заедно со подоброто спроведување и построгата регулатива, ќе испрати недвосмислена порака не само до компаниите што објавуваат и овозможуваат пристап до порнографија, туку и до целото општество: екстремната и насилна содржина што поттикнува вистинска штета не е прифатлива“, рече Бертин.
Високи казни и за платформата
Новите забрани се дел од британскиот Закон за криминал и полиција од 2026 година. Поседувањето забранета порнографска содржина се казнува со затвор до две години, додека нејзиното објавување може да се казни со затвор до пет години.
Законот, исто така, ги обврзува интернет-платформите да преземат проактивни мерки за да го спречат појавувањето и ширењето на ваквата содржина. Платформите ќе мора да ги проценат ризиците, да ги детектираат забранетите материјали и веднаш да ги отстранат.
Британскиот регулатор „Офком“ ќе може да изрекува казни до 18 милиони фунти или 10 проценти од нивниот годишен глобален приход (во зависност од тоа која сума е поголема) за компаниите што нема да ги исполнат своите обврски. Со ова, британските власти сакаат да спречат забранетата содржина да продолжи непречено да се шири на интернет.
© Vecer.mk, правата за текстот се на редакцијата
