Повеќе од еден милион луѓе во источна Кина, вклучително и од регионот на Шангај, се евакуирани од своите домови поради разорниот тајфун „Делфин“. Станува збор за тринаесеттиот тајфун годинава, кој ја погоди крајбрежната провинција Џеѓанг со брзина на ветерот поголема од 150 километри на час, пренесува ББС.
Драматични моменти и прекинати животи
Повеќе државни медиуми објавија дека деветгодишно момче од Венлинг исчезнало откако било повлечено од поплавните води кон морето додека со семејството претрчувало преку еден мол. Во јавноста се појави и снимка од тој драматичен момент, иако кинеските власти сè уште ја немаат официјално потврдено нејзината автентичност, ниту пак објавија официјални податоци за евентуални жртви.
Тајфунот двапати последователно удри на копното во областа Канмен и во градот Јуеќинг. Големите крајбрежни градови како Венџоу, Тајџоу и Нингбо веднаш прогласија состојба на највисок, прв степен на тревога.
Во Венџоу целосно беа запрени наставата, производството, сообраќајот и сите деловни активности, додека во Тајџоу сите 3.815 рибарски бродови беа повлечени на сигурно, а градежните работи на крајбрежјето беа прекинати.
Откинати летови и опасност од поплави
Поради бурата беше издадено највисокото, црвено предупредување, а сообраќајот низ целиот регион претрпе целосен колапс — само во Шангај беа откажани над 1.400 летови.
Иако стихијата утринава ослабна и премина во тропска бура додека се движи кон внатрешноста и северот на Кина, Националниот метеоролошки центар предупредува дека опасноста не е помината. До среда се очекуваат обилни дождови, големи поплави и ризик од свлечишта во повеќе провинции (Шандонг, Хенан, Хубеи, Анхуеј, Ѓангсу, Џеѓанг) и во Шангај.
Властите апелираат до граѓаните да не излегуваат на отворено, а повеќето главни туристички атракции во регионот остануваат затворени.
© Vecer.mk, правата за текстот се на редакцијата
