Во сите италијански училишта денеска стапи на сила забраната за покривање на лицето откако претседателот Серџо Матарела ја потпиша уредбата на десничарската влада на премиерката Џорџа Мелони, соопшти кабинетот на италијанскиот претседател. Според уредбата, лицата на учениците мора да останат препознатливи, со што во пракса се забрануваат исламските велови што целосно го покриваат лицето, како што се бурките и никабите.
Од учебната 2027/2028 година се воведува и ограничување според кое во првите одделенија на сите нивоа на образование најмногу 30 отсто од учениците може да бидат деца со странско потекло кои не зборуваат доволно добро италијански јазик. Мерките се воведени со итна уредба, а парламентот сега мора да ги потврди во рок од 60 дена.
Квотата се однесува на децата кои немаат италијанско државјанство, не се родени во Италија и не поминале најмалку две години во италијанска градинка. Во средните училишта учениците мора да имаат најмалку три години школување во Италија за да не влегуваат во таа квота.
Родителите исто така мора да го знаат јазикот
Од родителите кои имаат големи тешкотии со италијанскиот јазик исто така може да се бара да посетуваат јазични курсеви доколку поради тоа е отежната комуникацијата со училиштето на нивното дете. Премиерката Мелони ги најави мерките на почетокот на септември, а владата брзо потоа ја одобри уредбата.
Мелони од 2022 година ја предводи италијанската трипартитна коалиција составена од партии од крајната десница и конзервативци. На изборите победи со ветување дека ќе заземе поцврст став кон мигрантите.
Нејзината партија „Браќа на Италија“ (Fratelli d'Italia) и понатаму води во анкетите во пресрет на изборите што се очекуваат идната година. Коалицијата сепак неодамна се најде под притисок од новооснованата партија „Национална иднина“ (Futuro Nazionale) на поранешниот генерал Роберто Ваначи, која заговара уште постриктен пристап кон миграциите.
© Vecer.mk, правата за текстот се на редакцијата
