Западна Европа се соочува со вистински огнен пекол. Катастрофалните пожари што беснеат во Франција и Шпанија принудија повеќе од 220.000 луѓе да ги напуштат своите домови, додека пламените јазици продолжуваат неконтролирано да се шират, а властите предупредуваат дека ситуацијата е драматична.
„Со оглед на ширењето на пожарот и покрај големиот број ангажирани пожарникари и спасувачки екипи, ситуацијата налага да се обезбеди безбедноста на жителите во погодените подрачја“, изјави Софи Брока, челничка на департманот Жиронд во југозападна Франција.
Жителите на општините Сен Медар-ан-Жал (33.000 жители), Ле Ајан (11.400), Сен Жан д'Илак (9.600), Мартинјас-сур-Жал (8.000) и Сен Обен де Медок (7.800) беа принудени да ги напуштат своите домови, додека пожарите делумно ги зафатија и градовите Меринјак (78.000 жители) и Ејзин (24.800 жители).
Бројот на војници ангажирани како поддршка на пожарникарите ќе биде зголемен од 500 на 1.000 во департманите Жиронд и Ланд, соопшти во петокот вечерта францускиот премиер Себастијан Лекорну, по состанокот на владиното кризно тело.
Во овој дел од Франција, кој е една од најпопуларните туристички дестинации, пожарите досега принудија на евакуација 141.000 луѓе од средата навечер. Од нив, 110.000 се евакуирани во департманот Жиронд, а 31.000 во Ланд.
Популарниот француски полуостров Кап Фере, кој се наоѓа во близина на Бордо, е ставен под наредба за целосна евакуација, при што жителите и туристите се евакуираат и по копнен и по воден пат.
Францускиот министер за внатрешни работи Лоран Нуњез ја опиша ситуацијата како „целосно невидена“.
Во меѓувреме, во Шпанија околу 63.000 луѓе се евакуирани или им е наредено да останат во своите домови, соопшти Министерството за внатрешни работи. Меѓу нив се и 5.000 туристи, кои беа евакуирани од кампот Ел Ескоријал, северозападно од шпанската престолнина Мадрид.
Локалните власти велат дека ова е „најголемиот пожар во историјата“ на овој регион.
Повеќе од 1.200 постари лица и лица со попреченост беа евакуирани во петокот од домови за стари лица и установи за нега во регионот на Мадрид, соопштија локалните власти.
Во пожарите во петокот беше зафатена и една од трите локации на НАСА во Шпанија, а засега нема информации за евентуалната штета.
Регионалниот гувернер Франциско Мартин Агире изјави дека ситуацијата е „многу сложена“ поради силните ветрови и предупреди дека не може да се исклучи можноста за нови евакуации и воведување дополнителни безбедносни мерки.
Според надлежните служби, два од трите големи пожари, кои досега уништија околу 6.000 хектари западно од Мадрид, се споиле во еден голем огнен фронт.
Досега не е регистриран ниту еден смртен случај ниту во Франција, ниту во Шпанија.
Двете земји го активираа Европскиот механизам за цивилна заштита и побараа дополнителна помош во форма на авиони за гаснење пожари, со цел да се стави под контрола огнената стихија.
© Vecer.mk, правата за текстот се на редакцијата
