Општината Кумберг, во близина на Грац во австриската сојузна покраина Штаерска, е во шок по убиството на осумгодишно девојче, кое се случи вчера вечерта. Веста за злосторството се прошири денес низ градот, кој има помалку од 4.000 жители, а локалното население е во неверица поради трагедијата, пишува Heute.
Полицијата добила пријава за инцидентот во семејна куќа на главниот пат синоќа околу 22:45 часот. На местото на настанот пристигнале неколку полициски патроли. Тие го пронашле 37-годишниот татко во бањата со посекотини за кои се верува дека се самонанесени.
Според првичните информации, се сомнева дека таткото претходно ја нападнал својата осумгодишна ќерка и ѝ нанел неколку убодни и исечени рани.
На девојчето му била укажана прва помош на местото на настанот, по што итно е префрлена во болницата LKH Грац. Девојчето починало набргу потоа од тешките повреди.
На нејзиниот татко му е укажана и медицинска помош, по што полицијата го уапсила и го привела. Мотивот за злосторството сè уште е непознат. Криминалната полиција ги истражува сите околности.
Куќата каде што се случило убиството се наоѓа во центарот на Кумберг, недалеку од основното училиште. „Знаеме само дека се случило. Ужасно е“, изјавиле жителите за австриските медиуми.
На приземјето од двокатната куќа, ѕидовите се украсени со камен, додека прозорците на горните катови имаат решетки, за кои се верува дека се користат за заштита на децата. Зад куќата има голема градина што се протега во поле.
© Vecer.mk, правата за текстот се на редакцијата
