Украина го отфрли американскиот предлог за прекројување на границите на регионите Донецк и Луганск, со што емисарите на Белата куќа се обидоа да ѝ овозможат на Москва да прогласи контрола врз целиот Донбас без да ги освои градовите што сè уште ги држат украинските сили, пишува „Киев пост“.
Според тој план, административните граници на тие два региона би биле стеснети на хартија за да ја следат бојната линија, додека преостанатите слободни области едноставно би биле исклучени од дефиницијата на Донбас, со што Владимир Путин би имал симболична победа.
Со предлогот, специјалниот пратеник на Доналд Трамп, неговиот пријател и милијардер Стив Виткоф и зет Џаред Кушнер, се обидоа да ја заобиколат најголемата пречка за мировниот договор - руското барање за предавање на 5.000 квадратни километри територија што нивната армија не успеа да ја освои на терен. Сепак, веднаш пристигна отфрлање од Киев со порака дека никогаш нема да ја признаат руската окупација.
„Украинската делегација никогаш не разговараше за отстапки за окупираните територии. Украина никогаш нема да го признае тоа, ниту де факто ниту де јуре. Тоа отсекогаш бил нашиот став на масата“, изјави неименуван извор од украинскиот преговарачки тим.
Русите ги лажат Американците за состојбата на бојното поле
Првата рунда преговори во Абу Даби траеше четири и пол часа, а Џаред Кушнер на отворањето изјави дека Вашингтон верува оти Путин е подготвен за мир под одредени услови. Сепак, барањата на Москва се сè уште спротивни на она на што Киев може да се согласи. Путин продолжува да бара целосно повлекување на украинските сили од Донбас и признавање на руската анексија на четири украински региони и Крим како услов за прекин на огнот, што украинскиот претседател Володимир Зеленски постојано категорично го одбива.
Во вторник од Копенхаген, Зеленски ги обвини руските преговарачи дека го измамиле Вашингтон со лажни информации за ситуацијата на терен, тврдејќи дека контролираат многу поголема територија отколку што е всушност случај.
Според украинскиот претседател, Русите им покажале на Американците дека држат половина од областа што всушност сè уште ја брани украинската армија, а Киев ги поби овие тврдења на состанокот со видеа и фотографии од бојното поле. Зеленски, исто така, нагласи дека Путин ја убедува Белата куќа дека може да го освои преостанатиот дел од Донбас за само неколку месеци.
© Vecer.mk, правата за текстот се на редакцијата
